پارٹی کی لہر چل رہی ہے ‘جموں کشمیر میں اگلی سرکار بی جے پی کی ہو گی :رینا

سرینگر//
بھارتیہ جنتا پارٹی (بی ے پی) جموں وکشمیر یونٹ کے صدر رویندر رینا کا کہنا ہے کہ بی جے پی جموںکشمیر میں اگلی سرکار اپنے بل پر قائم کرے گی اور اس کو کسی دوسری پارٹی کے ساتھ گٹھ جوڑ کرنے کی ضرورت نہیں پڑے گی۔
رینا نے کہا کہ الیکشن کمیشن ایک خود مختار ادارہ ہے اور جموںکشمیر میں اسمبلی انتخابات کے انعقاد کا فیصلہ یہی ادارہ کرے گا۔ان کا کہنا تھا کہ جموں کشمیر میں جب بھی انتخابات ہوں گے بی جے پی لڑنے کیلئے تیار ہے ۔
یونٹ صدر نے ان باتوں کا اظہار بدھ کے روز جنوبی کشمیر کے ضلع اننت ناگ کے کھنہ بل علاقے میں نامہ نگاروں کے سوالوں کے جواب دینے کے دوران کیا وہ وادی کے پانچ روزہ دورے پر ہیں۔
رینا نے کہا’’میں اس وقت وادی کے پانچ روزہ دورے پر ہوں ہماری کوشش ہے کہ جموں و کشمیر میں تنظیمی نیٹ ور کو مزید مضبوط کیا جائے ‘‘۔ان کا کہنا تھا’’وادی میں بی جے پی کی زبردست لہر ہے یہاں ہر گھر میں بی جے پی کا جھنڈا پھیلایا جا رہا ہے ‘‘۔
سجاد لون کے بیان کہ جموں و کشمیرمیں اگلی سرکار بی جے پی اور نیشنل کانفرنس کی مخلوط سرکار ہوگی‘ کے جواب میں رینا نے کہا’’جس طرح سے بی جے پی کو جموں وکشمیر کے لوگوں کی دعائیں اور پیار مل رہا ہے تو میں یقین کے ساتھ کہتا ہوں کہ جموں وکشمیر میں اگلی سرکار بی جے پی کی اپنی سرکار ہوگی اس کو کسی بھی پارٹی کے ساتھ گٹھ جوڑ کرنے کی ضرورت نہیں پڑے گی‘‘۔
بی جے پی لیڈر نے کہا کہ بی جے پی پچاس سے زیادہ سیٹیں حاصل کر سکتی ہے اور جموں و کشمیر میں اگلا وزیر اعلیٰ بی جے پی کا ہی ہوگا۔
یونٹ صدر کا کہنا تھا کہ الیکشن کمیشن ایک خود مختار ادارہ ہے ‘جموں کشمیر میں اسمبلی انتخابات کے انعقاد کا فیصلہ یہی ادارہ لے گا۔انہوں نے کہا کہ جموں کشمیر میں جب بھی الیکشن ہوں گے بی جے پی ان میں حصہ لینے کے لئے تیار ہے ۔
ان کا کہنا تھا کہ جموں وکشمیر کے لوگ بی جے پی کو پیار کرتے ہیں کیونکہ وزیر اعظم نریندر مودی جی ان کے درد کو سمجھ کر ان کے زخموں پر مرہم لگانے کا کام کیا۔