‘مترکال’ کے خلاف جمہوریت کو بچانے کی لڑائی لڑ رہا ہوں : راہل

نئی دہلی//کانگریس کے لیڈر راہل گاندھی نے کہا ہے کہ وہ ‘مترکال’ میں جمہوریت کو بچانے کی جنگ لڑ رہے ہیں اور اس لڑائی میں سچائی ان کا واحد دوست ہے ۔
مسٹر گاندھی کو سورت کی ایک عدالت نے ہتک عزت کے ایک مقدمے میں مجرم قرار دیا ہے جس کی وجہ سے وہ لوک سبھا کی رکنیت سے نااہل ہو گئے تھے ۔ مسٹر گاندھی پیر کو سورت کی عدالت میں پیش ہوئے جہاں انہیں ضمانت مل گئی۔
کانگریس کے لیڈر نے اس سلسلے میں ٹویٹ کیا، "یہ جمہوریت کو بچانے کی لڑائی ہے ، ‘مترکال’ کے خلاف۔ اس جدوجہد میں سچ ہی میرا ہتھیار ہے اور سچ ہی میری پناہ ہے ۔ میں یہاں ملک کے عوام کی جمہوری آواز کو بچانے آیا ہوں۔
دریں اثنا، کانگریس نے اپنے آفیشل ٹویٹر ہینڈل پر مطلع کیا کہ یوتھ کانگریس کے کچھ کارکنان جو سورت جا رہے تھے ، کو پولیس نے روکا اور حراست میں لے لیا۔ پارٹی نے کہا، "کانگریس کے کچھ نوجوان راہل گاندھی کی حمایت کرنے سورت جا رہے تھے ، لیکن نوساری دیہی پولیس اسٹیشن نے ان نوجوانوں کو پکڑ کر حراست میں لے لیا۔ مودی سرکار نے اپنی بزدلی اور آمریت کا شرمناک ثبوت دیا۔
کانگریس کے کمیونیکیشن ڈپارٹمنٹ کے انچارج جے رام رمیش نے بھی یہ اطلاع دیتے ہوئے ٹویٹ کیا، ”گجرات کی بی جے پی حکومت کی طرف سے کانگریس لیڈروں اور کارکنوں کو سورت جانے سے روکنے کے لیے غیر قانونی گرفتاریوں کی مسلسل اطلاعات ہیں۔
بی جے پی کا غیر جمہوری چہرہ بار بار بے نقاب ہو رہا ہے ۔ کانگریس ان تمام حرکات کی مذمت کرتی ہے اور ان کی فوری رہائی کا مطالبہ کرتی ہے ۔