مودی اتوار کو کرناٹک کے منڈیا، ہبلی-دھارواڑ کا دورہ کریں گے

نئی دہلی// وزیر اعظم نریندر مودی پیر کو کرناٹک کے ایک دن کے دورے پر ہوں گے جس کے دوران وہ تقریباً 16,000 کروڑ روپے کے پروجیکٹوں کا افتتاح اور سنگ بنیاد رکھیں گے ۔
وزیر اعظم کے دفتر سے جاری ہونے والی ریلیز کے مطابق وزیر اعظم مودی 12 مارچ کو دوپہر 12 بجے کے قریب منڈیا میں سڑکوں کے بڑے پروجیکٹوں کا افتتاح اور سنگ بنیاد رکھیں گے ۔ اس کے بعد تقریباً 3.15 بجے وہ ہبلی-دھارواڑ میں مختلف ترقیاتی پروجیکٹ کا افتتاح اور سنگ بنیاد رکھیں گے ۔
مسٹر مودی منڈیا میں ایک تقریب میں بنگلورو-میسور ایکسپریس وے کا افتتاح کریں گے ۔ اس روٹ کے شروع ہونے سے دونوں بڑے شہروں کے درمیان سفر کا وقت تین گھنٹے سے کم ہو کر 75 منٹ رہ جائے گا۔ مسٹر مودی میسور-خوشال نگر کے درمیان چار لین والی شاہراہ کا بھی سنگ بنیاد رکھیں گے ۔
مسٹر مودی آئی آئی ٹی دھارواڑ کو قوم کے نام وقف کریں گے ۔ اس آئی آئی ٹی کا سنگ بنیاد وزیر اعظم نے فروری 2019 میں رکھا تھا۔ وہ دھارواڑ ملٹی ولیج واٹر سپلائی اسکیم کا بھی سنگ بنیاد رکھیں گے ۔
ہبلی میں وزیر اعظم ہبلی دھارواڑ اسمارٹ سٹی کے مختلف پروجیکٹوں کا افتتاح اور سنگ بنیاد رکھیں گے ۔ وزیر اعظم شری سدھارودھا سوامی جی کے ہبلی اسٹیشن پر دنیا کے سب سے طویل ریلوے پلیٹ فارم کا افتتاح کریں گے ۔ وہ دوبارہ تیار شدہ ہوساپیٹ اسٹیشن کو قوم کے نام وقف کریں گے ، جسے ہمپی کی یادگاروں کی طرز پر ڈیزائن کیا گیا ہے ۔