سائمن ڈول کی سرفراز احمد کی کپتانی پر شدید تنقید

لاہور///
نیوزی لینڈ کے سابق کرکٹر سائمن ڈول نے پی ایس ایل 8 میں کوئٹہ گلیڈی ایٹرز کے کپتان سرفراز احمد کو تنقید کا نشانہ بناتے ہوئے کوئی لحاظ نہ رکھا۔ کراچی کنگز کی اننگز کے دوران کمنٹری کرتے ہوئے سائمن ڈول گلیڈی ایٹرز کے کپتان کے مقرر کردہ فیلڈ سے متاثر نہیں ہوئے۔ سائمن ڈول نے تبصرہ کرتے ہوئے کہا کہ "سرفراز وہیں کھڑا ہے اور کچھ نہیں کر رہا ہے”۔
انہوں نے مزید کہا کہ “سرفراز اپنی بیٹنگ فارم کے ساتھ جدوجہد کر رہے ہیں۔ ان کی فارم کی کمی ان کی کپتانی سے ظاہر ہو رہی ہے۔ اس نے اپنے سٹرائیک ریٹ کو بڑھانے کے ساتھ جدوجہد کی ہے، سمجھ میں آتا ہے کہ اس کا اعتماد میدان میں بھی گر گیا ہے‘‘۔ سرفراز کو رن روکنے کے لیے تیزی سے آگے نہ بڑھنے پر عمر اکمل پر چیختے ہوئے بھی دیکھا گیا۔
دلچسپ بات یہ ہے کہ عمر اکمل نے 16ویں اوور میں سرفراز کی جگہ وکٹ کیپنگ کی کیونکہ گلیڈی ایٹرز کے کپتان زخمی انگلی کے ساتھ میدان سے باہر چلے گئے۔
سرفراز نے نسیم شاہ کی 142 کلومیٹر فی گھنٹہ کی ڈلیوری کو روکنے کی کوشش کی، لیکن اس عمل میں ان کی انگلی زخمی ہوگئی۔ چوٹ کے باوجود، سرفراز بیٹنگ پر آئے جب گلیڈی ایٹرز کے 5 کھلاڑی آئوٹ ہوچکے تھے لیکن انہیں بڑی ہٹس مارے میں مشکلات پیش آئیں اور سائمن ڈول نے ان کی بیٹنگ کو بھی تنقید کا نشانہ بنایا۔ سائمن ڈول کا کہنا تھا کہ ’گپٹل اب تک اینکر کا کردار ادا کر رہے ہیں، سرفراز اس سے بھی بدتر ہیں۔
اس ٹورنامنٹ میں یہ پہلی بار نہیں ہے کہ سرفراز اپنے سٹرائیک ریٹ کے ساتھ جدوجہد کر رہے ہیں‘‘۔ انہوں نے مزید کہا، "سرفراز کے لیے سٹریٹجک ریٹائرمنٹ کا وقت ہو سکتا ہے۔” گپٹل، جو ایک وقت پر 40 گیندوں پر 41 رنز پر کھیل رہے تھے، نے باولرز پر اٹیک کیا اور کوئٹہ کو میچ جتوانے والی ناقابل شکست 86 رنز کی اننگز کھیلی۔ سرفراز 25 گیندوں پر 29 رنز بنا کر رن آؤٹ ہوئے، انہوں نے اپنی وکٹ گپٹل کے لیے قربان کی۔