یوکرین خوفناک اقدام کرسکتا ہے، روس کا انتباہ

ماسکو//
روس نے کہا ہے کہ یوکرین، امریکہ کی حمایت سے ایک اور اشتعال انگیز کیمیائی حملے کی تیاری کر رہا ہے اور یوکرینی فوج فرضی کیمیائی حملہ کرسکتی ہے۔
غیر ملکی میڈیا کے مطابق روس نے کہا ہے کہ ٹھوس اطلاعات ہیں کہ یوکرین، امریکا کی حمایت سے ایک اور اشتعال انگیز کیمیائی حملے کی تیاری کر رہا ہے۔
ویانا میں سیکورٹی اور اسلحہ کنٹرول مذاکرات میں شریک روسی نمائندے گاوری لوف نے اپنے ایک بیان میں کہا ہے کہ ہمارے پاس ایسی ٹھوس اطلاعات موجود ہیں جن سے پتہ چلتا ہے کہ یوکرین بیرونی حمایت سے ایک اور کیمیائی حملے کی تیاری کر رہا ہے۔اس سے پہلے روسی وزرات دفاع نے کہا تھا کہ یوکرین خارکوف کے علاقے میں کیمیائی حملہ کرنا چاہتا ہے تاکہ اس کا الزام روس پر عائد کیا جائے۔
روسی وزارت دفاع نے بھی کلورین جیسے زہریلے مواد کی علاقے میں موجود گی کی تصدیق کی ہے۔ روسی وزارت دفاع کے ترجمان ایگور کناشنکوف نے کہا ہے کہ یوکرینی فورس نے خیمبروم کمپلکس کے انبار سے 120 ٹن کلورین حاصل کیا ہے۔اس سے قبل چیچن صدر رمضان قدیروف بھی یوکرینی فوج پر رہائشی علاقوں کے قریب سفید فارسفورس کے حامل بموں کے استعمال کا الزام عائد کرچکے ہیں۔