جموں//
جموں کے ملک مارکیٹ چھنی میں انسداد تجاوزات مہم کے دوران لوگ مشتعل ہوئے اور انہوں نے پتھراو کیا جس کے نتیجے میں ایک پولیس اہلکار زخمی ہوا جبکہ متعدد گاڑیوں کے شیشے چکنا چور ہوئے ۔
اطلاعات کے مطابق جموں کے ملک مارکیٹ چھنی میں شاپنگ کمپلیکس کو منہدم کرنے اور لوگوں کو نوٹسیں جاری کرنے کیخلاف ہفتے کے روز خلاف مرد و زن سڑکوں پر نکل آئے اور احتجاجی مظاہرئے کئے ۔
معلوم ہوا ہے کہ مظاہرین نے پولیس اور محکمہ مال کی ٹیم پر پتھراؤ کیا جس کے نتیجے میں کئی گاڑیوں کے شیشے چکنا چور ہوئے جبکہ ایک پولیس اہلکار کو چوٹ بھی آئی
حالات کی نزاکت کو دیکھتے ہی پولیس کی بھاری نفری کو علاقے میں تعینات کیا گیا۔
خواتین نے بتایا کہ ہماری مکانوں کو مسمار کرنے کی خاطر جے سی بی کے ذریعے محکمہ کی ٹیمیں وارد ہوئیں اور انہوں نے شاپنگ کمپلیکس اور مکانوں کو مسمار کرنے کا سلسلہ شروع کیا جس کے خلاف لوگ سڑکوں پر نکل آئے ۔انہوں نے کہاکہ ہمارے مکانوں کو مسمار کرنے کی سازشیں رچائی جارہی ہیں جس کو کسی بھی صورت میں برداشت نہیں کیا جائے گا۔
ذرائع نے بتایا کہ مساجد اور گردواروں سے لوگوں کو گھروں سے باہر آنے کی خاطر اعلانات کئے جارہے ہیں۔ملک مارکیٹ کی مین شاہراہ پر سینکڑوں کی تعداد میں مرد وزن سڑکوں پر دھرنے پر بیٹھے ہوئے ہیں جبکہ پولیس کے اعلیٰ حکام لوگوں کو سمجھانے کی کوشش کر رہے ہیں۔
آخری اطلاعا ت موصول ہونے تک علاقے میں کشیدگی کا ماحول تھا۔
ادھر انسداد تجاوزات مہم کے خلاف مرد وزن نے ہفتے کے روز سڑکوں پر آکر احتجاجی مظاہرئے کئے ۔
لوگوں نے ایل جی انتظامیہ سے فوری مداخلت کی اپیل کی۔
اطلاعات کے مطابق سدھرا جموں میں لوگوں کو نوٹسیں اجرا کرنے کے خلاف ہفتے کے روز مردو زن اور بوڑھے اور بچوں نے سڑکوں پر آکر احتجاجی مظاہرئے کئے اور جلوس نکالا۔
مظاہرین نے کہاکہ ضلعی انتظامیہ کی جانب سے لوگوں کو نوٹسیں اجرا کی گئیں جو حیران کن ہے ۔انہوں نے کہاکہ پچھلے کئی دہائیوں سے لوگ یہاں پر رہائش پذیر ہیں اور آج سرکار اُن کو اراضی خالی کرنے کے سلسلے میں نوٹسیں بھیج رہی ہیں۔
اُن کے مطابق ایل جی منوج سنہا نے کہاکہ غریبوں کے ساتھ چھیڑا نہیں جائے گا لیکن محکمہ مال کی ٹیمیں غریبوں کے آشیانوں کو ہی مسمار کرنے پر تلی ہوئی ہیں۔
مظاہرین نے ایل جی منوج سنہا نے مطالبہ کیا کہ اس مہم کو فوری طورپر روک دیا جائے کیونکہ اگرایسا نہیں کیا گیا تو اس کے منفی نتائج سامنے آسکتے ہیں۔
معلوم ہوا ہے کہ جلوس میں شامل لوگوں نے مین شاہراہ پر آکر بھی دھرنا دیا جس وجہ سے گاڑیوں کی آمدورفت کافی دیر تک معطل رہی۔