سرینگر/30جنوری
محکمہ موسمیات کی پیش گوئی کے عین مطابق سنیچر اور اتوار کی درمیانی شب وادی کشمیر کے لگ بھگ تمام حصوں میں برف باری کا سلسلہ شرع ہوا اور پیر کی صبح تک سری نگر سمیت پوری وادی نے برف کی سفید چادر اوڑھ لی۔
یہ تازہ برف باری سرینگر میں جہاں شہنشاہ زمستان چالیس روزہ چلہ کلان کی پہلی برف باری ہے وہیں دوسری طرف اس سے سردی کی شدت میں قدرے کمی محسوس کی گئی ۔
سری نگر میں پیر کی صبح تک تین انچ برف ریکارڈ کی گئی ، شمالی ، جنوبی اور وسطی کشمیر کے دور دراز علاقوں میں بھاری برف باری ہونے کی اطلاعات موصول ہو رہی ہیں۔
وادی کے سیاحتی مقامات گلمرگ، پہلگام ، سونہ مرگ ، ٹنگہ مرگ میں پیر کی صبح تک دو سے تین فٹ تک برف جمع ہوئی تھی ۔
موصولہ اطلاعات کے مطابق وادی کے بیشتر حصوں میں برف باری کا سلسلہ وقفہ وقفہ سے جاری ہے ۔ گرمائی راجدھانی میں تین انچ سے زیادہ برف کھڑی ہوگئی ہے جبکہ دوردراز اور بالائی علاقوں میں دو سے چارفٹ برف جمع ہوگئی ہے ۔
وادی کو بیرون دنیا سے جوڑنے والی سری نگر جموں قومی شاہراہ کو پیر کی صبح ہی ٹریفک کی آمدورفت کے لئے بند کردیا گیا جبکہ سری نگر کے ہوائی اڈے پر پروازوں کی آواجاہی بری طرح سے متاثر ہوکر رہ گئی ہے ۔
شدید برف باری کی وجہ سے شمالی کشمیر کے بارہمولہ اور جموں خطہ کے بانہال کے درمیان چلنے والی ریل خدمات کو بھی معطل کردیا گیا ہے ۔
موصولہ اطلاعات کے مطابق سری نگر جموں قومی شاہراہ کے علاوہ وادی کے درجنوں علاقوں کو ضلع صدر مقامات سے جوڑنے والی سڑکیں بند کردی گئی ہیں۔
واضح رہے کہ خطہ لداخ کو وادی سے جوڑنے والی سری نگر لیہہ قومی شاہراہ اور وادی کو جموں کے پیرپنچال سے جوڑنے والی مشہور مغل شاہراہ پر گاڑیوں کی آمدورفت پچھلے دو ہفتے سے بند ہے کیونکہ دونوں شاہرائیں بھاری مقدار میں برف جمع ہونے کے بعد بند کردی گئی تھیں۔
سرکاری ذرائع کے مطابق تازہ برف کے نتیجے میں تاریخی مغل روڈ، سرینگر‘ لیہہ شاہراہ، گریز- بانڈی پورہ روڈ، سادھنہ ٹاپ، زوجیلا، کیرن روڈ پر ٹریفک کی نقل و حمل معطل کر دی گئی ہے ۔
دریں اثنا وادی کشمیر میں تازہ برف باری کے بیچ سری نگر ہوائی اڈے پر کم روشنی کے باعث پیر کی صبح تمام پروازوں کو معطل کر دیا گیا۔
ائر پورٹ ذرائع نے بتایا کہ سری نگر میں جاری برف باری اور کم روشنی کے پیش نظر سری نگر بین الاقوامی ہوائی اڈاے پر پیر کی صبح تمام پروازوں کو معطل کر دیا گیا۔محکمہ موسمیات کے ایک ترجمان نے بتایاکہ آنے والے چوبیس گھنٹوں کے دوران مزید برف و باراں کا امکان ہے ۔
دریں اثنا وادی کے مختلف سیاحتی مقامات اور سری نگر میں موجود غیر مقامی سیاحوں کو تازہ برف باری سے لطف اندوز ہوتے ہوئے دیکھا گیا۔
صوبہ جموں سے موصولہ اطلاعات کے مطابق صوبہ کے تمام پہاڑی علاقوں بالخصوص کٹرہ، بھدرواہ اور ڈوڈہ میں تازہ برف باری ہوئی ہے ۔ جموں کے پہاڑی علاقوں میں برف باری کے نتیجے میں میدانی علاقوں میں درجہ حرارت میں نمایاں کمی آگئی ہے ۔
وادی کشمیر میں درمیانی شب سے شروع ہونے والی برف باری سے نظام زندگی درہم برہم ہوگیا ہے ۔محکمہ موسمیات کے ایک عہدیدار نے یو این آئی کو فون پر بتایا کہ وادی کشمیر میں برف باری کا سلسلہ وقفہ وقفہ سے اگلے بارہ گھنٹوں تک جاری رہ سکتا ہے ۔انہوں نے بتایا کہ منگل کی صبح سے موسم میں بہتر ی آنا شروع ہوگی۔