سرینگر/۲۰جنوری
وادی کشمیر کو ملک کے باقی حصوں کے ساتھ جوڑنے والی سرینگر، جموں قومی شاہراہ پر برف باری اور چٹانیں کھسک آنے کی وجہ سے جمعے کو ٹریفک کی نقل و حمل بند کر دی گئی۔
دریں اثنا سرینگر ہوائی اڈے پر جمعے کی صبح کم روشنی کے باعث کئی پروازیں موخر ہوگئیں۔ائیر پورٹ ذرائع نے بتایا کہ ہوائی اڈے پر صبح کی تمام پروازوں کو کم روشنی کی وجہ سے موخر کیا گیا۔انہوں نے کہا کہ روشنی میں بہتری کے ساتھ ہی قریب ساڑھے دس بجے فلائٹ آپریشن بحال کر دیا گیا۔
ٹریفک ذرائع نے بتایا کہ رام بن سیکٹر اور قاضی گنڈ میں برف باری کے باعث قومی شاہراہ پر ٹریفک کی نقل و حمل روک دی گئی۔انہوں نے کہا کہ رام بن ، بانہال سیکٹر میں قومی شاہراہ پر چٹانیں بھی کھسک آئی ہیں۔
ان کا کہنا تھا کہ شاہراہ پر ٹریفک کی آمد و رفت کو بحال کرنے کے لئے افرادی قوت اور مشینری کو کام پر لگا دیا گیا ہے ۔
ادھر وادی کو لداخ یونین ٹریٹری کے ساتھ جوڑنے والی سری نگر- لیہہ شاہراہ اور جنوبی کشمیر کے ضلع شوپیاں کو صوبہ جموں کے ضلع پونچھ کے ساتھ جوڑنے والا تاریخی مغل روڈ پہلے ہی بند ہیں۔قومی شاہراہ کے بند ہونے سے اہلیان وادی کو گونا گوں مشکلات سے دوچار ہونا پڑتا ہے ۔
لوگوں کا کہنا ہے کہ شاہراہ کے بند ہوتے ہی جہاں ایک طرف اشیائے ضروریہ کی کمی پیدا ہوجاتی ہے تو وہیں دوسری طرف گراں فروشی بھی آسمان چھونے لگتی ہے ۔
