بھارتی فضائیہ کا کرگل سے سرینگر اور جموں کورئیر سروس کا آغاز

سرینگر///
جموںکشمیر اور لداخ یونین ٹریٹریوں کی شہری آبادی کو راحت پہنچانے کیلئے بھارتی فضائی فورس نے کرگل سے سری نگر اور جموں تک کورئیر خدمات شروع کی ہیں۔
دفاعی ترجمان لیفٹیننٹ کرنل دویندر آنند نے اپنے ایک بیان میں کہا کہ موسم سرما کے دوران برف باری کے باعث کرگل سے سری نگر کا زمینی رابطہ بند ہونے سے لوگوں کو گونا گوں مشکلات سے دوچار ہونا پڑتا ہے ۔
آنند نے کہا’’بھارتی فضائی فورس عام شہریوں کو راحت و مدد بہم پہنچانے کے علاوہ کسی بھی غیر متوقع ہنگامی صورتحال سے نمٹنے کے لئے چوکس و چوکنا ہے ‘‘۔ان کا کہنا تھا کہ موسم سرما کے مشکل وقت میں فضائیہ فورس مقامی لوگوں کو سرینگر سے کرگل اور کرگل سے جموں اور سرینگر ائیر لفٹ کرانے کیلئے سہولت فراہم کرتا ہے ۔
دفاعی ترجمان نے کہا کہ آئی اے ایف ہیلی کاپٹروں کے ذریعے دور افتادہ علاقوں میں مریضوں کو ہسپتال پہنچانے کا کام بھی انجام دیتا ہے ۔انہوں نے کہا کہ امسال کرگل سے سری نگر اور جموں کورئیر سروس۱۸جنوری سے شروع کی گئی اور یہ سروس سڑک پر ٹریفک کی نقل و حمل بحال ہونے تک جاری رہے گی۔
ان کا کہنا تھا کہ یہ کورئیر سروس سرینگر سے کرگل ہفتے کی ہر پیر اور بدھ کو چلے گی جبکہ کرگل سے جموں ہفتے کی ہر منگل اور جمعرات کو آپریٹ کرے گی۔
دریں اثنا جمعرات کی اے این۳۲کرگل کورئر سروس خراب موسمی حالات کے پیش نظر معطل ہو گئی ہے ۔حکام نے کہا کہ اگلی سروس کا اعلان بعد میں کیا جائے گا۔