دھونی کو ڈھونڈنے والے بی سی سی آئی کے سابق اہلکار پودار چل بسے

کولکتہ// بنگال کے سابق کپتان اور جونیئر سلیکٹر پرکاش پودار کا منگل کو 82 سال کی عمر میں انتقال ہوگیا۔
1940 میں پیدا ہونے والے پودار نے 1960 سے 1977 کے درمیان بنگال کے لیے 74 میچ کھیلے، 11 سنچریوں کی مدد سے 3836 رنز بنائے۔
پودار بنگال کے کپتان تھے لیکن انہوں نے راجستھان کے ساتھ کھیلتے ہوئے دو بار رنجی ٹرافی کے فائنل میں بھی جگہ بنائی۔ وہ 1970-71 کے رنجی سیزن میں 70.25 کی اوسط سے 562 رنز کے ساتھ تیسرے سب سے زیادہ رنز بنانے والے کھلاڑی تھے۔
پودار نے ریٹائرمنٹ کے بعد ہندوستانی کرکٹ کنٹرول بورڈ (بی سی سی آئی) کے ‘ٹیلنٹ ریسورس ڈیولپمنٹ ونگ’ (ٹی آر ڈی ایس) کے افسر کے طور پر کام کیا جو 2002 میں نوجوان اور ہونہار ہندوستانی کرکٹرز کو تلاش کرنے کے لیے قائم کیا گیا تھا۔ دلیپ وینگسرکر کو اس وقت کے بی سی سی آئی کے صدر آنجہانی جگموہن ڈالمیا کے ذریعہ قائم کردہ اس پینل کا چیئرمین مقرر کیا گیا تھا۔
پودار کو 2003 میں ٹی آر ڈی ایس میں کام کرتے ہوئے مہندر سنگھ دھونی کو ڈھونڈنے کا سہرا جاتا ہے۔
اس وقت ٹی آر ڈی ایس آفیسر کے طور پر نیشنل کرکٹ اکیڈمی کو بھیجی گئی ایک رپورٹ میں پودار نے دھونی کے بارے میں لکھا تھاکہ”گیند کو اچھی طرح سے اسٹرائیک کرتا ہے، اس میں بہت زیادہ قوت ہے لیکن اسے وکٹ کیپنگ پر کام کرنے کی ضرورت ہے۔ تکنیکی طور پر بہت اچھا نہیں ہے۔ وکٹوں کے درمیان دوڑنے میں بہترین ہے۔
اس کے بعد دھونی کو 2003/04 میں انڈیا اے کے لیے منتخب کیا گیا، جب کہ 23 ​​دسمبر 2004 کو انہوں نے بین الاقوامی کرکٹ میں قدم رکھا۔ ہندوستان نے دھونی کی کپتانی میں ٹی۔ٹوئنٹی ورلڈ کپ 2007، ون ڈے ورلڈ کپ 2011 اور چیمپئنز ٹرافی 2013 جیتا تھا۔