پنشن فارم جمع کرنے کیلئے قطار میں کھڑا معمر شخص فوت

سرینگر//
حکام نے منگل کے روز تحصیل سوشل ویلفیئر آفیسر، بانڈی پورہ کے دفتر کے احاطے میں ایک۶۲ سالہ پنشن درخواست گزار کی موت سے متعلق تمام متعلقہ پہلوؤں کا پتہ لگانے کے لیے انکوائری کا حکم دیا ہے۔
جاری کردہ ایک بیان کے مطابق، حکام نے کہا کہ بڑھاپے کے پنشن کے درخواست دہندگان کو اپنی تصدیق کی ہارڈ کاپیاں جمع کرانے کی ضرورت نہیں ہے۔
بیان میں کہاگیا ’’ایک شخص آج ۲۰ دسمبر۲۰۲۲ کو صبح تقریباً ۹ بجے تحصیل سوشل ویلفیئر آفیسر، بانڈی پورہ کے دفتر کے احاطے میں گر گیا، جسے فوری طور پر ڈسٹرکٹ ہسپتال بانڈی پورہ لے جایا گیا، جہاں ڈیوٹی پر موجود ڈاکٹروں نے اسے مردہ لایاقرار دیا۔ بعد میں اس شخص کی شناخت سنا اللہ بھٹ ولد غلام حسن بھٹ سکنہ ملنگم بانڈی پورہ کے طور پر ہوئی، جس کی عمر تقریباً ۶۲ سال تھی۔
بیان میں مزید کہا گیا ہے’’اس سلسلے میں، یہ واضح کرنا ہے کہ اولڈ ایج پنشن کے درخواست دہندگان کو ان کی تصدیق کی ہارڈ کاپیاں جمع کرانے کی ضرورت نہیں ہے اور صرف درخواست دہندگان سے رابطہ کیا جاتا ہے جس میں کوئی فارمیلیٹی نہیں ہے یا کسی قسم کے مسائل ہیں، ضروری اصلاح کے لیے کنٹرول روم کے ذریعے رابطہ کیا جاتا ہے جو کہ سی ایس سی میں کیا جا سکتا ہے۔ اس معاملے میں، درخواست دہندہ کو ہارڈ کاپی جمع کرانے کے لیے تحصیل سوشل ویلفیئر آفیسر بانڈی پورہ کے دفتر جانے کی ضرورت نہیں تھی اور نہ ہی اسے سی ایس سی کا دورہ کرنے کے لیے بلایا گیا تھا‘‘۔
بیان میں کہا گیا ہے ’’مزید برآں، کیس کے تمام متعلقہ پہلوؤں کا پتہ لگانے کے لیے، ایک انکوائری کا حکم دیا گیا ہے جو ایڈیشنل ڈسٹرکٹ ڈیولپمنٹ کمشنر، بانڈی پورہ کرے گا اور اس کے نتائج کو مقررہ وقت پر شیئر کیا جائے گا‘‘۔
یاد رہے کہ شمالی کشمیر کے ضلع بانڈی پورہ میں منگل کی صبح ایک عمر رسیدہ شخص کی اچانک موت واقع ہوئی جب وہ بڑھاپے کی پنشن کا فارم جمع کرنے کیلئے قطار میں کھڑا اپنی بھاری کا انتظار کر رہا تھا۔
ذرائع نے بتایا کہ بانڈی پورہ کے تحصیل سوشل ویلفئر دفتر پر منگل کی صبح ایک عمر رسیدہ شخص اولڈ ایج پنشن فارم جمع کرنے کیلئے قطار میں کھڑا اپنی بھاری کا انتظار کر رہا تھا کہ وہ اچانک بے ہوش ہوگیا۔
ذرائع نے کہا کہ مذکورہ بزرگ کو علاج و معالجے کیلئے فوری طور پر ضلع ہسپتال بانڈی پورہ پہنچایا گیا جہاں ڈاکٹروں نے اس کو مردہ قرار دیا۔
متوفی کی شناخت ثنا واللہ بٹ ولد غلام حسن بٹ ساکن ملن گام کے بطور ہوئی ہے ۔
دریں اثنا ہسپتال ذرائع نے موت کی تصدیق کی اور ان کا کہنا ہے کہ بزرگ کی موت غالباً حرکت قلب بند ہونے سے واقع ہوئی ہے ۔
عوامی حلقوں کا کہنا ہے کہ وادی میں عمر رسیدہ افراد کو اولڈ ایج پنشن حاصل کرنے یا اس کیلئے درخواستیں جمع کرنے کیلئے لمبی قطاروں میں کھڑا ہو کر گھنٹوں انتظار کرنا پڑتا ہے جو ان لوگوں کیلئے عمر کے اس حصے میں انتہائی کرب ناک مسئلہ ہے ۔
لوگوں کا مطالبہ ہے یہ پنشن عمر رسیدہ افراد کے بینک کھاتوں میں ہر ماہ باقاعدگی کے ساتھ جمع ہونا چاہئے اور ان کیلئے درخواستیں جمع کرانے کا عمل بھی آسان بنایا جانا چاہئے ۔
قابل ذکر ہے کہ جموں وکشمیر پیپلز کانفرنس کے سربراہ سجاد غنی لون نے قریب ایک ہفتے قبل اپنے ایک ٹویٹ میں کہا تھا کہ کورونا جیسی وبا کا ریکارڈ وقت میں ویکسین تیار کیا گیا لیکن ہمارے یہاں موجودہ ڈیجیٹل زمانے میں بھی عمر رسیدہ افراد کو پنشن حاصل کرنے کیلئے قطاروں میں کھڑا رہنا پڑتا ہے ۔
ان کا کہنا تھا کہ ان عمر رسیدہ افراد کو دفتروں پر طلب کرنا اور انتظار کرانا ایک قدیم عمل ہے ۔