گوجروں‘ بیکروالوں کی ریزرویشن کی حیثیت میں کوئی تبدیلی نہیں:سنہا

جموں//
لیفٹیننٹ گورنر منوج سنہا نے منگل کو کہا کہ جموں کشمیر میں پہاڑی برادری کو ریزرویشن دینے سے گوجر اور بکروال برادریوں کے کوٹے پر کوئی اثر نہیں پڑے گا۔
یہاں ایک پروگرام کے موقع پر نامہ نگاروں سے بات کرتے ہوئے،سنہا نے پہاڑی برادری کو ریزرویشن دینے پر راجوری اور بارہمولہ کے دورے کے دوران مرکزی وزیر داخلہ امت شاہ کے بیان کا حوالہ دیا۔
سنہا نے کہا ’’کچھ لوگ سیاسی وجوہات کی بناء پر برادریوں کو گمراہ کرنے کی کوشش کر رہے ہیں، لیکن میں پھر اعتماد اور ذمہ داری کے ساتھ دہراتا ہوں کہ گوجروں، بیکروالوں، گڈیوں اور سیپیوں کے ریزرویشن کوٹہ میں کوئی تبدیلی نہیں آئے گی۔‘‘
پہاڑیوں کو شیڈول ٹرائب (ایس ٹی) کا درجہ دینے کے مرکز کے اقدام کے خلاف گجر اور بکروال احتجاج کر رہے ہیں۔
سنہا نے لوگوں پر زور دیا کہ وہ ریزرویشن کے مسئلہ پر عوام کو بھڑکانے والے لوگوں کے بہکاوے میں نہ آئیں کیونکہ یہ وہی لوگ ہیں جو خطے میں امن اور ترقی نہیں چاہتے ہیں۔
لیفٹیننٹ گورنر نے کہا کہ وزیر داخلہ امت شاہ نے گجروں اور دیگر برادریوں کو یقین دلایا ہے کہ ان کے مفادات کا تحفظ کیا جائے گا اور ان کے کوٹے میں ایک فیصد کی بھی کمی نہیں کی جائے گی۔’’میں پد یاترا کرنے والوں سے (ریزرویشن کے خلاف) گھر واپس آنے کی درخواست کرتا ہوں۔ کچھ مفاد پرست لوگ ریزرویشن پر افواہیں پھیلا رہے ہیں۔ یہ وہی لوگ ہیں جو خطے میں امن اور ترقی نہیں چاہتے ہیں‘‘۔
سنہا نے کہا کہ وزیر اعظم نریندر مودی قبائلیوں کے خوابوں کو پورا کرنے کیلئے انتھک محنت کر رہے ہیں۔انہوں نے کہا کہ حکومت جموں کشمیر کی ترقی میں قبائلی برادری کے اہم کردار اور شراکت کو تسلیم کرتی ہے۔
لیفٹیننٹ گورنر نے مزید کہا کہ جموں و کشمیر کے عوام کے کئی دہائیوں کے انتظار کے بعد وزیراعظم نے سماجی مساوات اور انصاف کے خواب کو حقیقت میں بدل دیا ہے۔
سنہانے کہا’’ہم سمارٹ کلاس رومز کے ذریعے قبائلی آبادی والے علاقوں میں اپنے سکولوں میں بہترین کارکردگی کے کلچر کو فروغ دے رہے ہیں۔ یہ اسکول نئے علم اور اختراعی سوچ کے ایک اہم ذریعہ کے طور پر کام کریں گے‘‘۔
لیفٹیننٹ گورنر نے کہا ’’مجھے یقین ہے کہ جنجاتیہ گورو سپتہ نہ صرف ہندوستانی آزادی میں قبائلی برادری کے بھرپور تعاون کا جشن منائے گا بلکہ قبائلی روایت اور ثقافتی اقدار میں فخر کا احساس پیدا کرے گا۔‘‘
قبل ازیں، لیفٹیننٹ گورنر نے قبائلی ایوارڈز کے لیے ایک ویب پورٹل کا آغاز کیا جو نامزدگی کے عمل کو ہموار اور شفاف بنائے گا۔
وزیر داخلہ امت شاہ نے گزشتہ ماہ اعلان کیا تھا کہ جموں و کشمیر کی پہاڑی برادری کو خانہ بدوش گوجر اور بکروال آبادی کے ساتھ ریزرویشن کے فوائد حاصل ہوں گے۔
گوجر اور جموں و کشمیر کی کچھ دوسری قبائلی برادریاں جنہیں۱۹۹۱ میں درج فہرست قبائل کے طور پر درج کیا گیا تھا، پہاڑیوں کو اس طرح کا درجہ دینے اور اس سے ملتے جلتے دیگر فوائد کی اس دلیل کے ساتھ مخالفت کر رہے ہیں کہ اس سے ایس ٹی کا پورا درجہ کمزور ہو جائے گا۔ گزشتہ چند ہفتوں کے دوران انہوں نے جموں خطہ میں کچھ مقامات پر احتجاجی مظاہرے کیے ہیں۔