بھدرواہ میں رہائشی مکان پر مٹی کا تودا گر آیا خاتون از جان، دو بیٹے زخمی

جموں/ 15نومبر
جموں وکشمیر کے بدرواہ کے دور افتادہ علاقے میں منگل کی صبح رہائشی مکان پر مٹی کا تودا گر آیا جس وجہ سے ایک خاتون برسر موقع ہی از جان ہوئی جبکہ اُس کے دو بیٹے زخمی ہوئے ۔
سرکاری ذرائع نے بتایا کہ بھدرواہ قصبہ سے تقریباً دس کلومیٹر دور بٹلہ گاوں میں منگل کی صبح تیز بارشوں کے بیچ رہائشی مکان پر مٹی کا تودا گر آیا جس کی زد میں خاتون اور اُس کے دو بچے آئے ۔
انہوں نے بتایا کہ مقامی لوگوں، فوج اور پولیس نے فوری طورپر ریسکیو آپریشن شروع کیا ، ڈھائی گھنٹے کی سخت کوششوں کے بعد خاتون اور اس کے دو بیٹوں کو ملبے سے نکال کر ہسپتال لے جایا گیا جہاں ڈاکٹروں نے کرنا دیوی کو مردہ قرار دیا۔
زخمیوں کی پہچان مچل سنگھ اور نکسن جریال کے بطور کی گئی ہے ۔
دریں اثنا انتظامیہ نے اہل خانہ کے حق میں 25 ہزار روپے کی امدادی رقم منظور کی ہے ۔