ٹیم ایک یونٹ کے طور پر کام کرنے میں کامیاب رہی: سکھجیت

نئی دہلی//ہندوستانی مردوں کی ہاکی ٹیم کے فارورڈ سکھجیت سنگھ نے ہفتہ کو کہا کہ ٹیم اب تک ایف آئی ایچ مردوں کی ہاکی پرو لیگ 2022-23 میں ایک یونٹ کے طور پر کام کرنے میں کامیاب رہی ہے۔
سکھجیت نے کہا، ’’مجھے لگتا ہے کہ ہم نے اچھی کارکردگی کا مظاہرہ کیا۔ ہمارا مقصد ایک یونٹ کے طور پر کھیلنا تھا اور ہم اس میں کامیاب رہے۔ جس انداز میں ہم کھیلنا چاہتے ہیں ہم نے ہاکی کھیلی۔ کچھ ایسے شعبے ہیں جہاں اسے بہتر بنایا جا سکتا ہے اور اب ہم اس پر کام کریں گے۔
ہندوستانی ٹیم نے ایف آئی ایچ مینز ہاکی پرو لیگ 2022–2023 میں اپنی مہم کا آغاز نیوزی لینڈ کے خلاف 4–3 سے جیت کے ساتھ کیا، حالانکہ وہ اپنے اگلے میچ میں اسپین (2–3) سے ہار گئی۔ ہندوستانی ٹیم نے اس شکست سے واپسی کی اور نیوزی لینڈ (7-4) پر ایک بار پھر بڑی جیت درج کرتے ہوئے اسپین کو 2-2 (شوٹ آؤٹ 3-1) سے شکست دی۔
سکھجیت ان چار میچوں میں ہندوستانی ٹیم کا حصہ تھے اور انہوں نے نیوزی لینڈ کے خلاف دوسرے میچ میں گول بھی کیا تھا۔
سکھجیت نے اپنے گول کے بارے میں کہا، "یہ ایک مشکل میچ تھا۔ ایک موقع پر ہم 1-3 پیچھے تھے۔ ہمارے لیے گول کرنا اہم تھا اور مجھے خوشی ہے کہ میں دیر سے اسکور کرنے میں کامیاب رہا۔ یہ میرے لیے ایک اچھا لمحہ تھا۔”
سکھجیت، جنہوں نے اس سال کے شروع میں ایف آئی ایچ ہاکی پرو لیگ 2021-22 کے دوران بین الاقوامی سطح پر ڈیبیو کیا تھا، نے کہا کہ انہوں نے گزشتہ چند مہینوں میں بہت کچھ سیکھا ہے۔ اسپین کے خلاف بین الاقوامی سطح پر ڈیبیو کرنے والے سکھجیت نے اب تک سات میچ کھیلے ہیں اور انہیں امید ہے کہ وہ ہاکی ورلڈ کپ 2023 میں بھی ہندوستان کی نمائندگی کریں گے۔
سکھجیت نے کہا، "ٹیم کے ساتھ کام کرنا اور تمام تجربہ کار اراکین کے ساتھ کھیلنا اپنے آپ کو بہتر بنانے کی تحریک ہے۔ ہر کوئی (کھلاڑی) مشورے بھی دیتا رہتا ہے جس سے مدد ملتی ہے۔ میں نے یقینی طور پر محسوس کیا کہ میں اس بار بہت بہتر کھلاڑی ہوں اور مجھے امید ہے کہ اس بہتری کو جاری رکھوں گا۔”
انہوں نے کہا، ’’ورلڈ کپ میں کم از کم ایک بار ملک کی نمائندگی کرنا ہر کھلاڑی کا خواب ہوتا ہے۔ مجھے بھی ایسا ہی کرنے کی امید ہے۔ میں میدان میں سخت محنت کر رہا ہوں اور میں ملنے والے ہر موقع سے فائدہ اٹھانے کی پوری کوشش کروں گا۔”