دھنکھڑ 11 سے 13 نومبر تک کمبوڈیا کے دورے پر رہیں گے

نئی دہلی// نائب صدرجمہوریہ جگدیپ دھنکھڑ 19ویں آسیان ہند چوٹی کانفرنس اور مشرقی ایشیا چوٹی کانفرنس میں شرکت کے لیے کل کمبوڈیا کی راجدھانی نوم پنہ جائیں گے ۔
وزارت خارجہ میں سکریٹری سوربھ کمار نے جمعرات کو یہاں بتایا کہ مسٹر دھنکھڑ 11 سے 13 نومبر تک کمبوڈیا کا دورہ کریں گے ۔ اس دورے کے دوران وہ نوم پنہ میں منعقد ہونے والی 19ویں آسیان-ہند چوٹی کانفرنس اور 17ویں مشرقی ایشیا چوٹی کانفرنس میں شرکت کریں گے ۔ وزیر خارجہ ایس جے شنکر بھی اس موقع پرموجود ہوں گے ۔
انہوں نے بتایا کہ ہندوستان-آسیان یادگاری کانفرنس 12 نومبر کو دونوں فریقوں کے درمیان باہمی تعلقات کے 30 سال مکمل ہونے کے موقع پر منعقد کی جا رہی ہے ۔ یہ سال آسیان-ہندوستان دوستی کے سال کے طور پر بھی منایا جا رہا ہے ۔ نائب صدر جمہوریہ 13 نومبر کو 17ویں مشرقی ایشیا چوٹی کانفرنس میں شرکت کریں گے ۔ آسیان کے 10 رکن ممالک برونائی، دارالسلام، کمبوڈیا، انڈونیشیا، لاؤ پی ڈی آر، ملائیشیا، میانمار، سنگاپور، تھائی لینڈ، فلپائن اور ویتنام اور آٹھ ڈائیلاگ پارٹنرز ممالک ہندوستان، چین، جاپان، جمہوریہ کوریا، آسٹریلیا، نیوزی لینڈ، امریکہ اور روس شامل ہوں گے ۔