ٹی 20 ولڈ کپ کا فائنل پاکستان اور بھارت کے درمیان نہیں دیکھنا چاہتے: جوز بٹلر

ایڈیلیڈ//
انگلینڈ کے کپتان جوز بٹلر نے کہا ہے کہ ان کی پوری کوشش ہوگی کہ ٹی 20 ورلڈ کپ کا فائنل پاکستان اور بھارت کے درمیان نہ ہو۔ ’ہندوستان ٹائمز‘ کی رپورٹ کے مطابق انگلش کپتان جوز بٹلر نے بھارت کے خلاف میچ سے قبل پریس کانفرنس کرتے ہوئے کہا کہ ’ہم یقینی طور پر ٹی ٹوئنٹی ولڈ کپ کا فائنل پاکستان اور بھارت کے درمیان نہیں دیکھنا چاہتے اور ہم اس بات کو یقینی بنانے کے لیے پوری کوشش کریں گے کہ دونوں کے درمیان فائنل میچ نہ ہو۔
‘ انہوں نے کہا کہ ’ہم میچ کو لے کر بہت پرجوش ہیں جو میرے خیال میں شاندار بھارتی ٹیم کے خلاف دنیا کے بہترین اسٹیڈیمز میں سے ایک میں ہے اور مجھے یقین ہے کہ کل اچھی طرح سے میچ کو سپورٹ کیا جائے گا اور یہ وہ وقت ہے جب آپ بطور کھلاڑی شامل ہونے جارہے ہوں۔
‘ انگلینڈ کے وکٹ کیپر کپتان نے ڈیوڈ ملان اور مارک ووڈ کے متعلق بات کرتے ہوئے کہا کہ ہم کوشش کریں گے کہ جتنی دیر ممکن ہو انہیں وقت دیں گے کیونکہ ڈیوڈ ملان چھوٹے سے زخم کی وجہ سے میدان چھوڑ گئے تھے، اور مارک ووڈ تھوڑے درد کی وجہ سے باہر گئے لیکن ہمیں اپنی میڈیکل ٹیم پر بھروسہ ہے۔
ان کا کہنا تھا کہ بھارت بہت ہی مضبوط ٹیم ہے اور بھارتی ٹیم مسلسل مستقل مزاج ہے اور اس طرح ان کے پاس جتنا ہنر ہے ان کی لائن اپ میں لاجواب کھلاڑی ہیں۔’ خیال رہے کہ آج پاکستان اور نیوزی لینڈ کی ٹیمیں ٹی20 ورلڈ کے پہلے سیمی فائنل میں آمنے سامنے آئیں جہاں شاہینوں نے کیوز کو روند کر ایونٹ کے فائنل کی ٹکٹ کٹا لی۔ جوز بٹلر کی قیادت میں انگلینڈ کی ٹیم جمعرات (کل) کو ایڈیلیڈ اوول میں ٹی 20 ورلڈ کپ کے دوسرے سیمی فائنل میں بھارتی ٹیم سے ٹکرائے گی اور اس میچ کے فاتح کا مقابلہ فائنل میں پاکستان سے ہوگا۔