پونچھ: مٹی کے تودے کی زد میں آکرماں بیٹی ہلاک

جموں//
جموں کشمیر کے ضلع پونچھ کے بفلیز علاقے میں جمعے کی علی الصبح ایک مکان مٹی کے تودے کی زد میں آنے سے ماں بیٹی کی موت واقع ہوئی جبکہ ان ہی کے کنبے کے دو دیگر افراد زخمی ہوگئے ۔
سرکاری ذرائع نے بتایا کہ پونچھ کے بفلیاز علاقے میں جمعے کی علی الصبح مٹی کے ایک تودے نے محمد لطیف نامی ایک شہری کے مکان کو اپنی زد میں لے لیا جس کے نتیجے میں ماں بیٹی کی بر سر موقع ہی موت واقع ہوگئی جبکہ دو دیگر افراد خانہ زخمی ہوگئے ۔
متوفین کی شناخت ۴۰سالہ نسیم اختر اور اس کی بیٹی۱۲سالہ روبینہ اختر جبکہ زخمیوں کی شناخت لطیف احمد اور ان کے بیٹے بشارت احمد کے بطور ہوئی ہے ۔
ذرائع نے کہا کہ واقعہ پیش آنے کے فوراً بعد پولیس، فوج اور مقامی لوگوں نے بڑے پیمانے پر بچاؤ آپریشن شروع کر دیا اور زخمیوں کو نکال کر فوری طور ہسپتال پہنچایا جہاں ان کی حالت مستحکم بتائی جاتی ہے ۔
دریں اثنا مقامی لوگوں نے حکومت سے متاثرہ کنبے کو فوری امداد فراہم کرنے کی اپیل کی ہے ۔پولیس نے اس ضمن ایک کیس درج کرکے کارروائی شروع کی ہے ۔
اس دوران جموں و کشمیر کے لیفٹیننٹ گورنر منوج سنہا نے پونچھ میں مٹی کے تودے کی زد میں آنے سے ماں بیٹی کے فوت پر افسوس کا اظہار کیا ہے ۔انہوں نے ضلع انتظامیہ کو متاثرہ کنبے کو بھر پور مدد فراہم کرنے کی ہدایت دی ہے ۔
لیفٹیننٹ گورنر نے اس واقعے پر افسوس کا اظہار کرتے ہوئے اپنے ایک ٹویٹ میں کہا’’پونچھ کے بفلیاز میں لینڈ سلائنڈنگ سے انسانی جانوں کے زیاں ہونے پر افسوس ہوا‘‘۔
سنہا نے ٹویٹ میں کہا’’مصیبت کی اس گھڑی میں میرے خیالات پسماندگان کے ساتھ ہیں اور میں زخمیوں کی جلد صحت یابی کے لئے دعا گو ہوں‘‘۔
ان کا ٹویٹ میں مزید کہنا تھا’’میں نے ضلع انتظامیہ کو ہدایت دی ہے کہ وہ متاثرہ کنبے کو ضروری امدام فراہم کرے ۔‘‘