نیشنل کانفرنس ایک پارٹی کے طور پر اسمبلی الیکشن لڑے گی:وانی

کپواڑہ//
نیشنل کانفرنس کے صوبائی صدر کشمیر‘ ناصر اسلم وانی نے جمعہ کو کہا کہ ان کی جماعت ایک پارٹی کے طور پر الیکشن لڑے گی اور دوسروں کو جگہ نہیں دینے دے گی۔
وانی شمالی کشمیر کے کپواڑہ میں مشہور درگاہ شاہ ولی مقام کے دورہ کے دوران صحافیوں سے بات کر رہے تھے۔
این سی صوبائی صدر کاکہنا تھا’’این سی انتخابات میں حصہ لے گی، جب بھی یہ منعقد ہوں گے۔ پارٹی دوسروں کو جگہ نہیں دینے دے گی‘‘۔
ایک سوال کے جواب میں، وانی نے کہاکہ اگر سابق وزیر اعلیٰ عمر عبداللہ نے انتخابات سے دور رہنے کا موقف اختیار کیا ہے، تو یہ اس بات کی منطق ہے کہ حکومت ہند نے جموں و کشمیر کی حیثیت کو گھٹا دیا ہے۔ ان کاکہنا تھا’’حکومت ہند نے آرٹیکل ۳۷۰؍ اور۳۵(اے) کو چھین لیا ہے اور جموں و کشمیر کی حیثیت کو گھٹا دیا ہے۔ اب اگر عمر عبداللہ الیکشن لڑیں گے تو وہ یو ٹی کے سی ایم کے طور پر کیا کریں گے‘‘۔
تاہم وانی نے کہا کہ این سی ایک پارٹی کے طور پر انتخابات میں حصہ لے گی اور شرپسند عناصر کو صورتحال کا فائدہ اٹھانے کی اجازت نہیں دے گی۔ ’’این سی الیکشن لڑے گی۔ پارٹی کسی کو جگہ نہیں دے گی‘‘۔
نیشنل کانفرنس نے رواں ہفتے ہی تمام اسمبلی انتخابی حلقوں کے لئے نگرانوں کا اعلان کیا ‘تاہم اس کاکہنا ہے یہ عمل الیکشن کی تیاری نہیں ہے ۔
قابل ذکر ہے کہ سابق وزیر اعلیٰ عمر عبداللہ نے کئی بار واضح کیا تھا کہ وہ اس وقت تک الیکشن نہیں لڑیں گے جب تک جموں و کشمیر کو ریاست کا درجہ نہیں دیا جاتا۔