بھارت کو اپ سیٹ کرنے کے بیان پر سہواگ نے شکیب کو آڑے ہاتھوں لے لیا

نئی دہلی//
بھارتی کرکٹ ٹیم کے سابق بیٹر وریندر سہواگ نے بھارت کو اپ سیٹ کرنے سے متعلق بیان پر بنگلادیش کے کپتان شکیب الحسن کو آڑے ہاتھوں لے لیا۔
بھارتی میڈیا کے مطابق وریندر سہواگ کا کہنا ہے کہ شکیب الحسن ویرات کوہلی کی طرح آخری تک کھیلتے، یا پھر ایسے الٹے سیدھے بیان نہ دیں۔
انہوں نے کہا کہ 99 سے 102 رنز کے درمیان بنگلادیش کی تین وکٹیں گر گئی تھیں، اس دوران 20 رنز کی ایک پارٹنر شپ بن جاتی تو میچ کا نتیجہ تبدیل ہو سکتا تھا۔
وریندر سہواگ کا کہنا ہے کہ بنگلادیشی کپتان سے غلطی ہو گئی، اس بات کی ذمے داری تو کپتان کو لینی چاہیے۔
ان کا مزید کہنا ہے کہ شکیب الحسن کپتان اور سینئر کھلاڑی ہیں ان کو اس وقت ذمے داری کا مظاہرہ کرنا چاہیے تھا۔
واضح رہے کہ دو روز قبل بنگلادیش کرکٹ ٹیم کے کپتان شکیب الحسن نے کہا تھا کہ اگر ہم نے بھارت کو شکست دی تو یہ اپ سیٹ ہو گا اور ہم بھارتی ٹیم کو اپ سیٹ کرنے کی پوری کوشش کریں گے۔
بنگلادیشی کپتان کا کہنا تھا کہ اگر ہم نے بھارت اور پاکستان کو شکست دی تو یہ ایک اپ سیٹ ہو گا کیوں کہ دونوں ٹیمیں ہم سے بہتر ہیں۔