جامع ترقی کو یقینی بنانے کیلئے تمام مشکلات کا مقابلہ کریںگے:آزاد

سرینگر//
چیئرمین‘ ڈیموکریٹک آزاد پارٹی (ڈی اے پی) غلام نبی آزاد نے بدھ کو کہا کہ ان کی پارٹی جموں کشمیر میں جامع ترقی کو یقینی بنانے کیلئے تمام مشکلات کا مقابلہ کرے گی۔
آزاد نے سرینگر میں ایک مقامی خبر رساں ایجنسی کے ساتھ خصوصی انٹرویو میںکہا’’ڈی اے پی اپنی پوری کوشش کرے گی اور جموں و کشمیر کی ترقی کی راہ میں آنے والی تمام رکاوٹوں کو دور کریگی‘‘۔
ڈی اے پی چیئرمین نے کہا کہ جمہوریت ملک کے ہر شہری کو اپنی سیاسی جماعت بنانے کا حق دیتی ہے۔انہوں نے کہا ’’میں جموں و کشمیر کو پرامن، خوشحال اور ترقی یافتہ بنانے کے مقصد کے ساتھ ڈی اے پی کے ساتھ آیا ہوں۔ ہم لوگوں کی فلاح و بہبود کے لیے ہر ممکن کوشش کریں گے اور مخالفین کو بدنام کرنے میں ملوث نہیں ہوں گے۔ ہم اپنا کام کریں گے اور دوسروں کو ان کا کام کرنے دیں گے‘‘۔
آزاد نے مزید کہا کہ جموں کشمیر کے لوگوں کی ترقی ان کی پہلی ترجیح ہوگی۔ انہوں نے کہا ’’آج جموں کشمیر کے لوگوں کو مہنگائی نے گھیرلیا ہے۔ اگر ہمیں اپنے لوگوں کو بچانا ہے تو ہمیں انہیں حالات پر قابو پانے کیلئے ۳۶۵ دن کا کام فراہم کرنا ہوگا‘‘۔
جموں و کشمیر کی موجودہ صورتحال پر بات کرتے ہوئے‘آزاد نے کہا کہ ایک جمہوری نظام میں لوگوں کو ان کے جذبات کا اظہار کرنے کیلئے جگہ دی جانی چاہیے۔ انہوںنے کہا’’جمہوریت میں حقوق حاصل کرنے کا انتظام ہوتا ہے۔ اگر اس پلیٹ فارم یا چینل کو روک دیا جائے گا، تو پھر لوگوں کے پاس اپنا غصہ ہرتالوں اور ایجی ٹیشن کی شکل میں ظاہر کرنے کے سوا کوئی چارہ نہیں ہوگا۔‘‘