کیجریوال کی قیادت میں دہلی کی تعلیم نئی بلندیوں پر : سسودیا

نئی دہلی// دہلی کے نائب وزیر اعلیٰ اور وزیر تعلیم منیش سسودیا نے کہا کہ وزیر اعلی اروند کیجریوال کی قیادت میں دہلی کی تعلیم نئی بلندیوں پر ہے اور اس سمت میں ریاستی حکومت آئی پی یونیورسٹی کا ایسٹ کیمپس تعمیر کرا رہی ہے ۔
مسٹر سسودیا نے بدھ کو کیمپس کی تعمیر کے آخری مرحلے کا جائزہ لینے کے بعد کہا کہ اس کے مکمل ہونے کے بعد یہاں تقریباً 2400 طلباء عالمی معیار کی تعلیم حاصل کریں گے ۔ موجودہ ضروریات کو مدنظر رکھتے ہوئے اس کیمپس میں روبوٹکس اینڈ آٹومیشن، ڈیزائن اینڈ انوویشن، فائر مینجمنٹ، لبرل آرٹس سمیت پانچ خصوصی مراکز قائم کیے جا رہے ہیں۔ اس کے ساتھ ساتھ یہاں عالمی معیار کی مرکزی لائبریری بھی تعمیر کی گئی ہے ۔ کیمپس کی تعمیر کا کام اپنے آخری مرحلے میں جاری ہے اور اسے جلد مکمل کر لیا جائے گا۔
انہوں نے کہا، ”گزشتہ آٹھ برسوں میں ہم نے دہلی کے سرکاری اسکولوں کو شاندار بنانے کا کام کیا ہے اور آج پوری دنیا میں اس کا تذکرہ ہے ۔ حکومت میں آنے کے بعد اعلیٰ تعلیم کو عظیم بنانا ہماری ترجیح تھی اور اس کے نتیجے میں وزیر اعلیٰ کی رہنمائی میں ہم نے دہلی حکومت کی تمام یونیورسٹیوں کے انفراسٹرکچر کو بہتر بنایا، انہیں جدید سہولیات سے آراستہ کیا اور 25,000 سے زیادہ سیٹیں بڑھانے کا کام کیا ہے ۔
انہوں نے کہا کہ کسی بھی ملک کے اسکول وہاں کی بنیاد کو مضبوط بنانے کا کام کرتے ہیں اور ملک کتنی بلندیوں پر جائے گا اس کی یونیورسٹیاں طے کرتی ہیں ۔ کیجریوال حکومت تعلیم کو اپنی ترجیح بناتے ہوئے بنیاد کو مضبوط کرنے کے ساتھ ساتھ ملک کو نمبر 1 بنانے کے عمل میں اپنی یونیورسٹیوں کے ذریعے ملک کو بلندیوں پر لے جانے کا کام کر رہی ہے ۔
دہلی حکومت مشرقی دہلی کے سورجمل وہار میں گرو گوبند سنگھ اندرا پرستھ یونیورسٹی کا نیا کیمپس 18.75 ایکڑ کے رقبے میں تعمیر کروا رہی ہے ۔