بھارت جوڑو یاترا نے تلنگانہ کو پولرائز کرنے کی سازش کو ناکام بنایا: کانگریس

حیدرآباد//کانگریس کے رکن پارلیمنٹ اور پارٹی کے اقلیتی سیل کے صدر عمران پرتاپ گڑھی نے بدھ کو دعویٰ کیا کہ بھارت جوڑو یاترا کی کامیابی سے صاف ظاہر ہوتا ہے کہ حیدرآباد کے لوگوں نے بھارتیہ جنتا پارٹی (بی جے پی) اور تلنگانہ راشٹرا سمیتی (ٹی آر ایس) کی فرقہ وارانہ سیاست کو مسترد کر دیا ہے ۔
پریس کو جاری کردہ ایک بیان میں مسٹر پرتاپ گڑھی نے کہا کہ کانگریس لیڈر راہل گاندھی نے ٹی آر ایس اور بی جے پی کے ناپاک اتحاد کو بے نقاب کیا ہے جو تلنگانہ کے سیکولر تانے بانے کو تباہ کرنے کی کوشش کر رہی ہے ۔ مسٹر گاندھی کی تقاریر نے چیف منسٹر کے چندر شیکھر راؤ (کے سی آر) کے سیکولرازم کا جعلی نقاب بے نقاب کردیا ہے ۔ انہوں نے کہاکہ ‘‘یہ کے سی آر ہی تھے جنہوں نے کانگریس کو کمزور کرنے کے واحد ارادے سے تلنگانہ میں بی جے پی کو مضبوط کیا۔’’
انہوں نے کہا کہ تلنگانہ فرقہ پرستی کے وائرس سے متاثر ہوا ہے ۔ کے سی آر نے بی جے پی کو دو ضمنی انتخابات اور جی ایچ ایم سی میں کچھ سیٹیں جیتنے میں مدد کی تاکہ وہ مضبوط نظر آئے ۔ ٹی آر ایس اور بی جے پی نے مذہب کی بنیاد پر لوگوں میں فرقہ وارانہ تقسیم پیدا کرنے کی کوشش کی ہے ۔
کانگریس ایم پی نے کہا کہ یاترا کے دوران حیدرآباد کی گلیوں میں ہزاروں لوگوں نے ‘بھارت جوڑو’ کے نعرے لگائے ۔ یہ بی جے پی اور ٹی آر ایس کو سیدھا پیغام تھا کہ تلنگانہ میں اب ان کی فرقہ وارانہ سیاست نہیں چلے گی۔