شاہد آفریدی کا بابر اعظم کے بارے میں سخت تبصرے پر گوتم گمبھیر پر جوابی حملہ

لاہور//
پاکستان کے سابق کپتان شاہد آفریدی نے بابر اعظم کے بارے میں سخت تبصرے پر سابق بھارتی ٹیسٹ اوپنر گوتم گمبھیر پر جوابی حملہ کیا ہے۔ شاہد آفریدی نے کہا کہ لوگوں کو اپنے استعمال کردہ الفاظ سے بہت محتاط رہنے کی ضرورت ہے اور تنقید کو حملہ آور انداز کے بجائے تعمیری انداز میں آنا چاہیے۔ گوتم گمبھیر نے 2022ء کے ٹی ٹونٹی ورلڈ کپ کے دوران بابر کی کپتانی پر تنقید کی تھی۔
انہوں نے کہا کہ بابر ایک خودغرض کپتان ہے کیونکہ وہ اپنی ضروریات کو ٹیم کی ضروریات سے پہلے رکھتا ہے۔ ان کا مزید کہنا تھا کہ بابر کو آرڈر میں تنزلی کرنی چاہیے تھی جبکہ فخر زمان کو ہالینڈ کے خلاف پاکستان کے میچ میں اوپنر کے طور پر بھیجا جانا چاہیے تھا۔
گوتم گمبھیر کی تنقید آفریدی کو ایک آنکھ نہ بھائی کیونکہ ان کا خیال تھا کہ گمبھیر کے الفاظ کا انتخاب نامناسب تھا۔
آفریدی نے بابر کی حمایت کرتے ہوئے کہا کہ وہ طویل عرصے سے مسلسل میچ جیتنے والی پرفارمنس کے ساتھ پرفارم کر رہے ہیں اور 2022ء کے ٹی ٹونٹی ورلڈ کپ میں توقعات پر پورا نہیں اترنے کی وجہ سے وہ غیرضروری حملوں کا شکار ہو گئے ہیں۔ شاہد آفریدی نے کہا کہ "ہمیشہ تنقید ہوتی ہے لیکن آپ کو الفاظ کے ساتھ بہت محتاط رہنے کی ضرورت ہے ،آپ کو ایسے الفاظ استعمال کرنے چاہئیں جو کھلاڑی کے لیے نصیحت کے طور پر آنے چاہئیں اور آپ لوگوں کو بھی اس کو سمجھا سکتے ہیں ،جہاں تک بابر کا تعلق ہے، اس نے بہت سی میچ وننگ پرفارمنس دی ہیں۔
بابر اعظم کا فارم میں واپس آنا قومی ٹیم کے لیے بہت ضروری ہے کیونکہ مین ان گرین کا جمعرات کو سڈنی کرکٹ گراؤنڈ میں جنوبی افریقہ سے مقابلہ ہوگا۔ پاکستان کی جیت سیمی فائنل کے لیے کوالیفائی کرنے کی امیدیں زندہ رکھے گی جبکہ شکست سابق چیمپئنز کے لیے سیمی فائنل کھیلنے کی امیدوں کا خاتمہ کردے گی۔