بی ایس ایف نے امرتسر سیکٹر میں پاکستانی ڈرون کو مار گرایا‘ منشیات برآمد

امرتسر//
بارڈر سکیورٹی فورس (بی ایس ایف) نے پنجاب کے امرتسر سیکٹر میں ایک پاکستانی ڈرون کو مار گرایا ہے ۔ ڈرون سے ڈھائی کلو منشیات برآمد ہوئی ہیں۔
بی ایس ایف کے تعلقات عامہ کے افسر نے منگل کے روز بتایا کہ۱۷؍اکتوبر کو، شام ساڑھے آٹھ بجے کے قریب، سرحد پر تعینات۱۸۳ویں بٹالین بی ایس ایف کے الرٹ دستوں نے گاؤں چھانہ، ضلع امرتسر کے نزدیک علاقے میں پاکستان سے ہندوستانی علاقے میں داخل ہونے والے مشتبہ ڈرون کا پتہ لگایا۔ انہوں نے کہا کہ فوجیوں نے فائرنگ کرکے مشتبہ ڈرون کو زمین پر مار گرایا۔
افسر نے بتایا کہ ابتدائی تلاشی کے دوران، بی ایس ایف پارٹی نے پولی بیگ میں لپٹی ہوئی ایک کواڈ کاپٹر (میک، ڈی جے آئی میٹرکس) اور مشتبہ منشیات (تقریباً ۵ء۲کلوگرام) برآمد کیں۔ پورے علاقے کو گھیرے میں لے لیا گیا ہے اور پولس اور متعلقہ اداروں کو مطلع کر دیا گیا ہے ۔