’بدھ کی شام سے بارشوں اور بلکی برف باری کا امکان‘

سرینگر//
محکمہ موسمیات نے کشمیر میں ۱۹؍ اکتوبر کی رات سے۲۰؍ اکتوبر تک میدانی علاقوں میں بارشوں اور بالائی علاقوں میں ہلکی برفباری کی پیش گوئی کی ہے۔
محکمہ موسمیات کے ایک اہلکار نے کہا کہ وہ خطے میں بدھ کی شام (۱۹؍ اکتوبر) سے اگلے جمعرات کی سہ پہر تک اونچائی میں ہلکی برف باری اور میدانی علاقوں میں وسیع بارش کی توقع کر رہے ہیں۔
اہلکار نے کہا کہ آنے والے دنوں میں وادی میں دن کے درجہ حرارت میں معمولی کمی واقع ہوگی اور شام کو سردی زیادہ ہوگی۔انہوں نے کہا کہ جموں و کشمیر اور لداخ میں اگلے ۱۰ دنوں تک کسی بڑی برف باری کی کوئی پیش گوئی نہیں ہے۔
ادھر وادی میں شبانہ درجہ حرارت کہیں معمول سے زیادہ تو کہیں معمول سے کم ریکارڈ ہوا ہے ۔
دارلحکومت سرینگر میں کم سے کم درجہ حرارت۴ء۷ڈگری سینٹی گریڈ ریکارڈ کیا گیا جو معمول سے۴ء۱ڈگری سینٹی گریڈ زیادہ ریکارڈ ہوا تھا۔
سیاحتی مقام گلمرگ میں کم سے کم درجہ حرارت۰ء۴ڈگری سینٹی گریڈ ریکارڈ کیا گیا جو معمول سے۷ء۰ڈگری سینٹی گریڈ زیادہ ریکارڈ ہوا تھا۔ایک اورسیاحتی مقام پہلگام میں کم سے کم درجہ حرارت۶ء۲ڈگری سینٹی گریڈ ریکارڈ کیا گیا جو معمول سے۳ء۰ڈگری سینٹی گریڈ زیادہ ریکارڈ ہوا تھا۔
شمالی ضلع کپوارہ میں کم سے کم درجہ حرارت۷ء۴ڈگری سینٹی گریڈ ریکارڈ کیا گیا جو معمول سے۵ء۰ڈگری سینٹی گریڈ کم ریکارڈ ہوا تھا۔
قاضی گنڈ میں کم سے کم درجہ حرارت۰ء۵ڈگری سینٹی گریڈ ریکارڈ کیا گیا جو معمول سے۲ء۰ڈگری سینٹی گریڈ کم ریکارڈ ہوا تھا۔
دریں اثنا وادی میں پیر کو صبح سے ہی موسم خشک رہا اور موسم خزاں کی قدرے نحیف دھوپ بھی چھائی رہی جس سے لوگوں کو مختلف مقامات جیسے صحنوں، دکان تھڑوں اور پارکوں میں لطف اندوز ہوتے ہوئے دیکھا گیا۔