وقاص صفدر// رنز کی مشین کہے جانے والے بابراعظم نے ویراٹ کوہلی کے ایک اور ریکارڈ پر نظریں جما لیں۔
پاکستان کے کپتان بابر اعظم بدھ کو لاہور کے قذافی اسٹیڈیم میں انگلینڈ کے خلاف ہونے والے ٹی ٹوئنٹی میں نئی تاریخ رقم کر سکتے ہیں۔
ٹی ٹوئنٹی میں دو سنچریاں بنانے والے بابراعظم ایک اور بڑے کارنامے پر نظریں جمائے ہوئے ہیں جو اس اسٹار بلے باز کے لیے کھیل کے مختصر ترین فارمیٹ میں ویرات کوہلی کو پیچھے چھوڑنے کی راہ ہموار کر سکتا ہے۔
سابق ہندوستانی کپتان کوہلی مختصر ترین فارمیٹ میں 3000 رنز مکمل کرنے والے تیز ترین بلے باز ہیں۔ کوہلی نے ٹیم انڈیا کے لیے 81 اننگز میں یہ کارنامہ انجام دیا تھا۔
سابق ہندوستانی کپتان 2021 میں انگلینڈ کے دورہ ہند کے دوران تیز ترین 3000 رنز بنانے والے بلے باز بنے تھے۔ کل بروز بدھ کو بابر کے پاس پاکستان اور انگلینڈ کے درمیان 5ویں ٹی ٹوئنٹی میں کوہلی کا ریکارڈ توڑنے کا موقع ہے۔
گرین شرٹس کے کپتان نے 79 اننگز میں 2939 رنز بنائے ہیں۔ اس طرح بابر کو ٹی ٹوئنٹی میں ایک اور بڑا کارنامہ انجام دے کر کوہلی کو پیچھے چھوڑنے کے لیے 61 رنز بنانے درکار ہیں۔
