ڈی جی پی کا کپواڑہ میں اگلے علاقوں کا دورہ‘ سیکورٹی صورتحال کا جائزہ

سرینگر//
جموں و کشمیر کے ڈائرکٹر جنرل آف پولیس ‘ دلباغ سنگھ نے آج کپواڑہ ضلع کے ٹیٹوال‘ کیرن، گوگل دھر کے اگلے علاقوں کا دورہ کیا جہاں انہوں نے سرحدی سیکورٹی کے حالات کا جائزہ لیا۔
دلباغ نے پنچایتی راج اداروں (پی آر آئیز) کے نمائندوں اور مقامی لوگوں سے بات چیت کی اور سرحدی پولیس چوکیوں کے لیے جگہوں کا سروے بھی کیا۔
ڈی جی پی نے جنگی یادگار ٹیٹوال میں شہیدوں کو خراج عقیدت پیش کیا اور زیر تعمیر شاردا مندر/گردوارہ کا بھی دورہ کیا۔
ایک بیان کے مطابق ڈی جی پی نے ٹیٹوال اور کیرن کا دورہ کیا اور پولیس اور فوج کے افسران اور جوانوں کے ساتھ ساتھ پی آر آئی اور مقامی لوگوں کے نمائندوں سے بھی بات چیت کی۔
ڈی جی پی نے کمانڈروں اور فوجیوں کو ان کے پیشہ ورانہ معیارات اور سرحد پار عناصر کی طرف سے لاحق خطرات کو ناکام بنانے کی صلاحیت کی تعریف کی۔ انہوں نے نارکو دہشت گردی کے ابھرتے ہوئے چیلنج کو ختم کرنے کے لیے موثر اقدامات اپنانے پر زور دیا۔ بات چیت کے دوران ممکنہ سیکورٹی چیلنجز اور انسدادی اقدامات پر تبادلہ خیال کیا گیا۔
دورے کے دوران ڈی جی پی نے ٹیٹوال اور کیرن میں عوامی رابطہ میٹنگیں بھی کیں جس کے دوران انہوں نے امن کی بحالی میں لوگوں کے کردار کی تعریف کی۔ انہوں نے منشیات کے کاروبار کو روکنے کے لیے اجتماعی اقدامات پر زور دیتے ہوئے کہا کہ یہ ہماری نوجوان نسل کو نقصان پہنچانے کے لیے استعمال ہو رہی ہے۔
دلباغ نے کہا کہ منشیات نہ صرف صارف بلکہ پورے معاشرے کو متاثر کرتی ہیں۔ انہوں نے نوجوانوں کو مشورہ دیا کہ وہ ایک بہتر کل کے لیے قوم کی تعمیر کی سرگرمیوں میں حصہ لیں۔ انہوں نے منشیات کی غیر قانونی تجارت کو روکنے کے لیے فعال تعاون کی اپیل کی۔ انہوں نے ٹیٹوال میں شاردھا مندر اور گوردوارہ میں بھی پوجا کی۔
ڈی جی پی نے پولیس اسٹیشن کیرن کا بھی دورہ کیا اور پولیس اسٹیشن کے کام کاج کا جائزہ لیا۔ انہوں نے سرحد پار نارکو تجارت کو محدود کرنے کے لیے چوکنا رہنے پر زور دیا۔ انہوں نے پولیس اسٹیشن میں جوانوں اور افسران کے لیے دستیاب سہولیات کا بھی معائنہ کیا۔