کپوارہ میں دو افراد کی تحویل سے ممنوعہ ادویات کی بڑی کھیپ ضبط:پولیس

سرینگر//
پولیس نے شمالی ضلع کپوارہ میں ایک سرکاری ملازم سمیت دو افراد کو گرفتار کرکے ان کی تحویل سے ممنوعہ ادویات کی بڑی کھیپ بر آمد کرنے کا دعویٰ کیا ہے ۔
ایک پولیس ترجمان نے اپنے ایک بیان میں کہا کہ ایک مصدقہ اطلاع پر کارروائی عمل میں لاتے ہوئے پولیس اسٹیشن لال پورہ کی ایک ٹیم نے ایس ایچ او مشتاق احمد کی سربراہی میں کروسن لولاب میں ایک ناکہ لگا دیا۔
ترجمان نے کہا کہ ناکے کے دوران ایک گاڑی کو چیکنگ کیلئے روک دیا گیا۔
بیان میں کہا گیا کہ تلاشی کے دوران گاڑی سے کوڈین کی۴۵۰بوتلوں پر مشتمل ممنوعہ منشیات کی بڑی کھیپ بر آمد کی گئی۔
بیان کے مطابق اس جرم کے مرتکب گاڑی میں سوار دو افراد کو گرفتار کیا گیا۔
پولیس نے بیان میں گرفتار شدگان کی شناخت مدثر احمد شاہ ولد مرحوم محمد عبداللہ شاہ جو محکمہ تعلیم کا ملازم ہے ، اور ایثار احمد شاہ ولد امان اللہ شاہ ساکنان درد پورہ لولاب کے بطور کی ہے ۔
پولیس ترجمان نے کہا کہ ابتدائی پوچھ تاچھ کے دوران یہ بات سامنے آئی ہے کہ گرفتار شدگان نے ضبط شدہ ممنوعہ ادویات بیرون یونین ٹریٹری لایا تھا اور اس کو بیچنے کیلئے اپنے آبائی علاقے کی طرف جا رہے تھے ۔
پولیس نے اس ضمن میں ایک ایف آئی آر درج کیا ہے اور مزید تحقیقات شروع کی ہے ۔
ترجمان کا کہنا ہے کہ اس سلسلے میں مزید گرفتاریاں متوقع ہیں۔