مرمو نے ملیریا ریسرچ انسٹی ٹیوٹ کی گولڈن جوبلی تقریبات کا افتتاح کیا
نئی دہلی، 17 نومبر (یواین آئی) صدر جمہوریہ دروپدی مرمو نے منگل کو یہاں انڈین کونسل آف میڈیکل ریسرچ (آئی سی ایم آر) کے نیشنل ملیریا ریسرچ انسٹی ٹیوٹ کی سال بھر جاری رہنے والی گولڈن جوبلی تقریبات کا افتتاح کیا اور کہا کہ اس طرح کے اہم ادارے تحقیق، تعاون اور اختراع کے ذریعے 2047 تک ترقی یافتہ ہندوستان کے صحت سے متعلق اہداف کے حصول میں اہم کردار ادا کر سکتے ہیں۔
صدر جمہوریہ نے کہا کہ ہندوستان نے ملیریا پر قابو پانے کے معاملے میں قابل ذکر پیش رفت کی ہے۔ سال 2024 میں ہندوستان عالمی ادارہ صحت (ڈبلیو ایچ او) کے ‘ہائی برڈن ٹو ہائی امپیکٹ’ زمرے سے باہر ہو گیا۔ انہوں نے کہا کہ ملیریا کے خلاف اس طویل جدوجہد میں نیشنل ملیریا ریسرچ انسٹی ٹیوٹ نے اہم کردار ادا کیا ہے۔ گزشتہ پانچ دہائیوں کے دوران اس ادارے نے ملیریا کے طفیلی جراثیم، مچھروں، بیماری پھیلانے والے حشرات پر قابو پانے، کیڑے مار ادویات کے خلاف مزاحمت اور برادری پر مبنی نگرانی جیسے شعبوں میں نمایاں تحقیق کی ہے۔
صدر جمہوریہ نے کہا کہ موسمیاتی تبدیلی، غیر منصوبہ بند شہر کاری اور کیڑے مار ادویات کے خلاف مچھروں میں بڑھتی ہوئی مزاحمت جیسے نئے چیلنجز ملیریا کے خاتمے کی راہ میں نئی رکاوٹیں پیدا کر سکتے ہیں۔ ایسی صورت حال میں صرف صحت کارکنوں کی کوششیں ملیریا کے پھیلاؤ کو روکنے کے لیے کافی نہیں ہو سکتیں۔ پانی جمع ہونے سے روکنے، مچھروں کی افزائش کے مقامات ختم کرنے اور ماحول کے بہتر انتظام پر توجہ دینا بھی ضروری ہے۔ انہوں نے اعتماد ظاہر کیا کہ پالیسی ساز اور سائنسی برادری اس سمت میں اجتماعی طور پر کوششیں کر رہے ہیں۔









