ہاکی ورلڈ کپ 2026 نے دنیا بھر میں 40.33 کروڑ ٹی وی ناظرین کا ریکارڈ بنایا

بیلجیم اور نیدرلینڈ میں منعقد ایف آئی ایچ ہاکی ورلڈ کپ 2026 نے ٹیلی ویژن ناظرین کے معاملے میں نیا ریکارڈ قائم کیا ہے۔
لائیو کوریج، ہائی لائٹس، تاخیر سے نشر ہونے والے پروگراموں اور ری پیٹ نشریات کے ذریعے دنیا بھر میں مجموعی طور پر 40.33 کروڑ ناظرین نے ٹورنامنٹ دیکھا۔ خواتین اور مردوں کے ورلڈ کپ کے مشترکہ انعقاد نے عالمی سطح پر ہاکی کو غیر معمولی شناخت دلائی اور دنیا بھر کے شائقین کو اس کھیل سے جوڑا۔
کل ناظرین میں سے 30 فیصد ہندوستان سے تھے، جبکہ لاطینی امریکہ اور چین میں سے ہر ایک کا حصہ 15 فیصد رہا۔ نیدرلینڈ، جرمنی اور پاکستان بھی اہم مارکیٹوں میں شامل رہے۔ اس سے ظاہر ہوتا ہے کہ بین الاقوامی سطح پر ہاکی کی فین فالوئنگ کتنی مضبوط ہے اور ورلڈ کپ مختلف خطوں کے شائقین کو جوڑنے میں کتنا کامیاب رہا ہے۔
2026 کے اس ایڈیشن میں خواتین کے ہاکی ورلڈ کپ 2022 اور مردوں کے ہاکی ورلڈ کپ 2023 کے مشترکہ ٹیلی ویژن ناظرین کے مقابلے میں دگنی تعداد ریکارڈ کی گئی۔ یہ کھیل کی عالمی رسائی اور مقبولیت کے لیے ایک اہم سنگ میل ہے۔
ناظرین کی تعداد میں یہ غیر معمولی اضافہ نہ صرف کھیل کے معیار اور سنسنی کو ظاہر کرتا ہے بلکہ ایف آئی ایچ کی نشریاتی حقوق کی حکمت عملی میں تبدیلی کی بھی عکاسی کرتا ہے۔ اس کا بنیادی مقصد ‘فری ٹو ایئر یعنی مفت نشریات والے چینلوں پر زیادہ توجہ دے کر کھیل تک رسائی آسان بنانا تھا، تاکہ زیادہ سے زیادہ شائقین کسی ادائیگی والے سبسکرپشن کے بغیر میچوں سے لطف اندوز ہوسکیں۔
ٹورنامنٹ کو زیادہ سے زیادہ لوگوں تک پہنچا کر ایف آئی ایچ نے ہاکی کے موجودہ شائقین سے آگے بڑھتے ہوئے دنیا بھر میں مزید لوگوں تک اس کھیل کو پہنچانے کی کوشش کی۔ ناظرین کے اعداد و شمار سے ظاہر ہوتا ہے کہ آسان اور مفت نشریات پر مبنی حکمت عملی کسی بڑے بین الاقوامی کھیل ایونٹ کی رسائی کو کس حد تک وسیع کرسکتی ہے۔ ہاکی کے لیے نیا معیار قائم ایف آئی ایچ ہاکی ورلڈ کپ 2026 (بیلجیم اور نیدرلینڈ) نے ثابت کردیا ہے کہ جب عالمی معیار کے کھیل کے مقابلے کو ایسی تقسیم اور نشریاتی حکمت عملی کے ساتھ جوڑا جائے، جس کا مقصد کھیل کو آسانی سے قابل رسائی بنانا اور زیادہ سے زیادہ لوگوں تک پہنچانا ہو، تو ہاکی کے اس بڑے ایونٹ میں عالمی سطح پر کتنے امکانات موجود ہیں۔ یہ نتائج ایف آئی ایچ کے لیے ایک مضبوط بنیاد فراہم کرتے ہیں، جس کی مدد سے وہ اس رفتار کو مزید آگے بڑھا سکتا ہے، ہاکی کے بین الاقوامی ناظرین کا دائرہ وسیع کرسکتا ہے اور دنیا بھر کے شائقین تک اس کھیل کو پہنچانے کا سلسلہ جاری رکھ سکتا ہے۔ ورلڈ کپ کے دوران ناظرین کی تعداد، نشریاتی شراکت داروں اور ایف آئی ایچ کے ڈیجیٹل پلیٹ فارم کی کارکردگی پر تبصرہ کرتے ہوئے ایف آئی ایچ کے صدر طیب اکرام نے کہا، ”ایف آئی ایچ ہاکی ورلڈ کپ 2026 ہمارے کھیل کا شاندار جشن تھا، خواہ وہ میدان پر ہو، ناظرین کے درمیان ہو یا پوری دنیا میں۔ اس نے ٹی وی پر بے مثال ناظرین حاصل کیے، سوشل میڈیا پر بہترین ردعمل دیکھنے کو ملا اور ‘واچ ڈاٹ ہاکی’ کے لیے بھی شاندار نتائج سامنے آئے۔ اس طرح ہاکی پہلے سے کہیں زیادہ لوگوں تک پہنچی ہے۔’