سرینگر؍۱۴؍اکتوبر
محکمہ اسکولی تعلیم کشمیر نے بدھ کے روز وادیٔ کشمیر کے سرکاری اور تسلیم شدہ نجی اسکولوں کے اوقات کار میں تبدیلی کا اعلان کیا ہے۔ نیا شیڈول۱۵؍ اکتوبر۲۰۲۶سے نافذ العمل ہوگا۔
۱۴ ؍اکتوبر کو جاری کردہ ایک حکم نامےکے مطابق، سرینگر شہر کی میونسپل حدود میں واقع تمام اسکول صبح۱۰ بجے سے سہ پہر ساڑھے۳ بجے تک کام کریں گے۔
دریں اثنا، سرینگر ضلع کی میونسپل حدود سے باہر واقع اسکولوں اور صوبہ کشمیر کے دیگر علاقوں میں قائم تعلیمی اداروں کے اوقات کار صبح ساڑھے۱۰بجے سے شام۴بجے تک مقرر کیے گئے ہیں۔
محکمہ اسکولی تعلیم کشمیر کے ڈائریکٹر کی جانب سے جاری کردہ یہ حکم نامہ سرکاری اور تسلیم شدہ نجی تعلیمی اداروں، دونوں پر لاگو ہوگا۔
محکمہ نے تمام متعلقہ اداروں کو ہدایت دی ہے کہ وہ نئے اوقات کار پر سختی سے عمل درآمد یقینی بنائیں اور مقررہ شیڈول میں کسی قسم کی تبدیلی نہ کریں۔
حکم نامے کی نقول محکمہ اسکولی تعلیم، صوبائی کمشنر کشمیر، ضلع ترقیاتی کمشنروں، چیف ایجوکیشن افسران اور دیگر متعلقہ حکام کو اطلاع اور سختی سے عمل درآمد کے لیے ارسال کی گئی ہیں۔
ڈائریکٹر اطلاعات سے بھی درخواست کی گئی ہے کہ اس حکم نامے کی وسیع پیمانے پر تشہیر پرنٹ اور الیکٹرانک ذرائع ابلاغ کے ذریعے یقینی بنائی جائے۔
سرکاری حکم نامے کے مطابق، تبدیل شدہ اوقات کار۱۵؍ اکتوبر۲۰۲۶سے نافذ العمل ہوں گے۔
۔۔۔۔۔۔۔(ایجنسیاں )
