شیفالی اور شبھمن کو آئی سی سی پلیئر آف دی منتھ ایوارڈ

ہندوستانی کرکٹ ٹیم کے لیے گزشتہ ماہ ایشیا کپ اور ایشین گیمز 2026 میں شاندار کارکردگی کا مظاہرہ کرنے والی شیفالی ورما نے ستمبر کے لیے خواتین کا آئی سی سی پلیئر آف دی منتھ ایوارڈ جیت لیا ہے، جبکہ ہندوستان کے کپتان شبھمن گل نے ویسٹ انڈیز کے خلاف ون ڈے سیریز میں شاندار کارکردگی کی بدولت ریکارڈ پانچویں مرتبہ آئی سی سی پلیئر آف دی منتھ کا ایوارڈ حاصل کیا ہے۔
شیفالی کے ساتھ سری لنکا کی کپتان چماری اتھاپتھو اور ہندوستان کی بائیں ہاتھ کی اسپن گیندباز شری چَرَنی بھی خواتین کے ایوارڈ کی دوڑ میں شامل تھیں۔ ورما، جنہوں نے گزشتہ سال نومبر میں جنوبی افریقہ کے خلاف ویمنز ون ڈے ورلڈ کپ کے فائنل میں میچ وننگ اننگز کھیلنے کے بعد یہ ایوارڈ جیتا تھا، بڑے مقابلوں میں شاندار کارکردگی کے بعد دوسری بار یہ اعزاز حاصل کرنے میں کامیاب رہی ہیں۔
جارحانہ سلامی بلے باز شیفالی ہندوستان کے ایشیا کپ جیتنے کے دوران ٹیم کی سب سے زیادہ رنز بنانے والی کھلاڑی تھیں۔ انہوں نے 184.61 کے اسٹرائیک ریٹ سے 360 رنز بنائے اور اس دوران چھ وکٹیں بھی حاصل کیں۔ ایشین گیمز میں انہوں نے سیمی فائنل میں بنگلہ دیش کے خلاف ناٹ آؤٹ 100 رنز اور فائنل میں سری لنکا کے خلاف 48 رنز بنائے۔ ورما نے کہا، آئی سی سی پلیئر آف دی منتھ ایوارڈ دوبارہ جیتنا میرے لیے ایک شاندار اعزاز ہے۔ ایشیا کپ اور ایشین گیمز میں ہماری کامیابی میں اپنا کردار ادا کرنا انتہائی اطمینان بخش تھا اور یہ ایوارڈ ان کامیابیوں کو مزید خاص بناتا ہے۔
انہوں نے کہا، میں آنے والے مہینوں کے لیے پرجوش ہوں اور اپنی بہترین کارکردگی جاری رکھنے کے لیے پرعزم ہوں۔ اگلے سال فروری میں آئی سی سی ویمنز چیمپئنز ٹرافی بھی ایک اہم ٹورنامنٹ ہے۔ ورلڈ کپ جیتنے کی یادیں اب بھی تازہ اور خاص ہیں اور میں گھریلو میدان پر آئی سی سی ٹورنامنٹ کے لیے دوبارہ میدان میں اترنے کی منتظر ہوں۔ یہ ایک ناقابل فراموش تجربہ ہونے والا ہے۔
دوسری جانب گل نے ویسٹ انڈیز کی کپتان ہیلی میتھیوز کی برابری کرتے ہوئے مردوں میں ریکارڈ پانچویں مرتبہ یہ ایوارڈ حاصل کیا ہے۔ میتھیوز بھی پانچ مرتبہ آئی سی سی پلیئر آف دی منتھ رہ چکی ہیں۔ گل نے اس سے قبل جنوری اور ستمبر 2023 اور فروری اور جولائی 2025 میں یہ ایوارڈ جیتا تھا۔
ہندوستان کے ٹیسٹ اور ون ڈے کپتان نے ترواننت پورم میں ویسٹ انڈیز کے خلاف پہلے ون ڈے میں 110 رنز بنائے، جس کی بدولت میزبان ٹیم نے آٹھ وکٹ سے کامیابی حاصل کرکے سیریز میں 1-0 کی برتری بنائی۔
اس کے بعد انہوں نے اپنی سب سے تیز ڈبل سنچری بنائی۔ گل نے 133 گیندوں پر 223 رنز کی اننگز کھیلی، جس کی بدولت ہندوستان نے 406 رنز کا بڑا ہدف آٹھ وکٹ باقی رہتے حاصل کرلیا اور 39 گیندیں ابھی باقی تھیں۔
گل نے کہا، اپنا پانچواں آئی سی سی پلیئر آف دی منتھ ایوارڈ جیت کر بہت اچھا محسوس ہو رہا ہے۔ رنز بنانا انتہائی اطمینان بخش تھا اور گھریلو شائقین کے سامنے کامیاب رنوں کے تعاقب کا حصہ بننا اسے مزید خاص بناتا ہے۔ ان کی حمایت سے ہمیں ہمیشہ اضافی حوصلہ ملتا ہے۔ ون ڈے کرکٹ کی رفتار کافی بڑھ گئی ہے اور آپ کو فوری فیصلے کرنے، حالات کا تیزی سے جائزہ لینے اور پچ اور ہدف کے تقاضوں کے مطابق خود کو ڈھالنے کی ضرورت ہوتی ہے۔”
انہوں نے کہا، ”اگلے سال جنوبی افریقہ میں آئی سی سی مینز کرکٹ ورلڈ کپ کے پیش نظر ہم اپنے معیار کو بلند کرنے اور ایک مضبوط اور متوازن ٹیم تیار کرنے کے لیے پرعزم ہیں، جو آنے والے چیلنجز کا سامنا کرنے کی صلاحیت رکھتی ہو۔”