بحیرہ اسود میں تجارتی جہازوں پر حملے قابل مذمت، بات چیت سے تنازعات حل ہوں: ہندوستان

نئی دہلی، 7 اکتوبر (یو این آئی) ہندوستان نے گزشتہ 2 دنوں کے دوران بحیرہ اسود میں تجارتی جہازوں پر مسلسل حملوں کی سخت مذمت کرتے ہوئے کہا ہے کہ تمام تنازعات کا حل بات چیت اور سفارت کاری کے ذریعے ہونا چاہیے۔
وزارت خارجہ کے ترجمان رندھیر جیسوال نے بدھ کو یہاں میڈیا بریفنگ میں ان حملوں کے بارے میں پوچھے گئے سوالات کے جواب میں کہا کہ گزشتہ 2 دن سے بھی کم عرصے میں 4 تجارتی جہازوں پر حملے کیے گئے ہیں۔
انہوں نے کہا کہ یہ تمام جہاز غیر ملکی پرچم والے تھے، لیکن ان میں سے 3 پر ہندوستانی ملاح سوار تھے۔
انہوں نے کہا کہ ان جہازوں پر مجموعی طور پر 33 ہندوستانی ملاح سوار تھے۔ یہ سب محفوظ ہیں، لیکن ان میں سے 2 ہندوستانی ملاح زخمی ہوئے ہیں اور ان کا متعلقہ ممالک میں علاج کیا جا رہا ہے۔ ان ممالک میں ہندوستانی سفارت خانے زخمی ملاحوں کو مناسب مدد فراہم کر رہے ہیں۔ انہوں نے کہا کہ چوتھے جہاز پر سوار افراد کے بارے میں معلومات حاصل کی جا رہی ہیں۔
ترجمان نے کہا کہ تجارتی جہازوں پر حملے بند ہونے چاہئیں اور تصادم کا حل بات چیت اور سفارت کاری کے ذریعے ہونا چاہیے۔ انہوں نے کہا کہ ہندوستان ابتدا ہی سے آزاد اور بین الاقوامی قوانین پر مبنی بحری آمدورفت کا حامی رہا ہے۔
ایک دیگر سوال کے جواب میں انہوں نے کہا کہ آبنائے ہرمز اور بحیرہ اسود، دونوں علاقوں میں تجارتی جہازوں پر حملوں کے واقعات میں ہندوستانی ملاحوں کی موت ہوئی ہے، لیکن ان کی تعداد کے بارے میں ان کے پاس فی الحال معلومات نہیں ہیں۔