انکش پنگھال نے طلائی تمغہ جیتا، ہندوستانی باکسرز نے گولڈ کی ہیٹ ٹرک مکمل کی

آئیچی ناگویا، 2 اکتوبر (یواین آئی) ہندوستان کے 21 سالہ باکسر انکش پنگھال نے جنوبی کوریا کے کِم من سیونگ کو فائنل میں 4-0 سے شکست دے کر مردوں کے 80 کلوگرام وزن کے زمرے میں طلائی تمغہ جیت لیا۔ اس کے ساتھ ہی ہندوستانی باکسرز نے ایشین گیمز میں طلائی تمغوں کی ہیٹ ٹرک مکمل کرلی۔
ہریانہ کے انکش نے تیز کاؤنٹر پنچنگ اور بہترین موومنٹ کے ذریعے مقابلے پر کنٹرول برقرار رکھا۔ انہوں نے ابتدائی راؤنڈ میں کئی واضح پنچ لگائے اور 4-1 کی برتری حاصل کی۔ دوسرے راؤنڈ میں کِم نے دباؤ بنانے کی کوشش کی، لیکن انکش نے جوابی حملوں کے ذریعے مؤثر پنچ لگاتے ہوئے راؤنڈ بھی اپنے نام کرلیا۔
برتری حاصل کرنے کے بعد انکش نے آخری راؤنڈ میں محتاط حکمت عملی اختیار کی اور غیر ضروری تبادلے سے گریز کرتے ہوئے اپنی برتری برقرار رکھی۔ بالآخر انہوں نے 4-0 سے کامیابی حاصل کرکے ایشین گیمز کا طلائی تمغہ اپنے نام کرلیا۔
انکش نے کوارٹر فائنل میں تاجکستان کے نیکروز سلیم وف کو 5-0 سے شکست دے کر تمغہ یقینی بنایا تھا۔ سیمی فائنل میں انہوں نے ازبکستان کے موجودہ 75 کلوگرام عالمی چیمپئن فضلی الدین ارکین بویف کے خلاف ابتدائی دور میں پیچھے رہنے کے بعد شاندار واپسی کرتے ہوئے 4-1 سے کامیابی حاصل کی تھی۔ دو ماہ قبل انکش نے دولت مشترکہ کھیلوں میں بھی طلائی تمغہ جیتا تھا۔
ان کا طلائی تمغہ ہندوستان کا ایشین گیمز میں باکسنگ کا تیسرا اور مجموعی طور پر چھٹا تمغہ ہے۔ اس سے قبل لَوِلینا بورگوہین اور پروین ہڈا نے بھی آج اپنے اپنے فائنل جیت کر طلائی تمغے حاصل کیے تھے۔