سری نگر؍۲۲ستمبر
عوامی اتحاد پارٹی کے سینئر رہنما اور لنگیٹ کے رکن اسمبلی شیخ خورشید نے منگل کے روز جموں و کشمیر قانون ساز اسمبلی میں مطالبہ کیا کہ۱۳ جولائی کو سرکاری تعطیل کے طور پر بحال کیا جائے اور اس دن کی تاریخی اہمیت کو باضابطہ طور پر تسلیم کیا جائے۔
شیخ خورشید نے جاری اسمبلی اجلاس کے دوران یہ مطالبہ اٹھاتے ہوئے حکومت پر زور دیا کہ وہ سرکاری تعطیل کی بحالی کے لیے ضروری اقدامات کرے۔
۱۳ جولائی کو جموں و کشمیر میں یومِ شہدا کے طور پر منایا جاتا تھا۔ یہ دن۱۹۳۱ میں سری نگر کی مرکزی جیل کے باہر ہلاک ہونے والے افراد کی یاد میں منایا جاتا تھا۔۲۰۱۹کے بعد اسے سرکاری تعطیلات کی فہرست سے خارج کردیا گیا۔۲۰۲۶ کی سرکاری تعطیلات کی فہرست میں بھی۱۳ جولائی شامل نہیں ہے۔
شیخ خورشید نے حکومت پر زور دیا کہ وہ اس تعطیل کی بحالی کے لیے اقدامات کرے۔ انہوں نے کہا کہ خطے کے سیاسی اور جمہوری سفر سے وابستہ تاریخی مواقع کو عوامی یادداشت سے خارج نہیں کیا جانا چاہیے۔
۔۔۔۔۔۔۔(ندائے مشرق ڈیسک)
