افغانستان متحدہ عرب امارات میں بنگلہ دیش اور زمبابوے کی میزبانی کرے گا، تینوں فارمیٹس میں کھیلے جائیں گے میچ

دبئی، 8 ستمبر (یو این آئی) افغانستان اکتوبر اور نومبر میں متحدہ عرب امارات (یو اے ای) میں بنگلہ دیش اور زمبابوے کی میزبانی کرے گا۔ اس دوران تینوں فارمیٹس میں کرکٹ کھیلی جائے گی۔ افغانستان کرکٹ بورڈ نے ابھی تک میچوں کے مقامات کا اعلان نہیں کیا ہے۔
سیزن کا آغاز 9 اکتوبر کو بنگلہ دیش کے خلاف ایک ٹیسٹ میچ سے ہوگا۔ یہ تاریخ جاپان میں ہونے والے ایشیائی کھیلوں کے ٹی-20 ٹورنامنٹ کے فائنل کے چھ دن بعد کی ہے، بشرطیکہ افغانستان فائنل تک پہنچے۔
اس کے بعد 17 سے 23 اکتوبر تک ایک روزہ میچوں کی سہ فریقی سیریز کھیلی جائے گی، جس میں افغانستان، بنگلہ دیش اور زمبابوے ایک دوسرے کے خلاف کھیلیں گے، جبکہ سرفہرست دو ٹیمیں فائنل میں مدمقابل ہوں گی۔
اس کے بعد افغانستان 27 اکتوبر سے یکم نومبر تک زمبابوے کے خلاف تین ٹی-20 بین الاقوامی میچوں کی سیریز کھیلے گا۔ پھر دونوں ٹیموں کے درمیان دو ٹیسٹ میچ کھیلے جائیں گے۔ پہلا ٹیسٹ 5 سے 9 نومبر اور دوسرا 13 سے 17 نومبر تک ہوگا۔ افغانستان اس سال پہلے ہی ایک ٹیسٹ میچ کھیل چکا ہے، جو جون میں نیو چنڈی گڑھ میں ہندوستان کے خلاف کھیلا گیا تھا۔
بنگلہ دیش اور زمبابوے کے خلاف تین مزید ٹیسٹ میچ کھیلنے کے بعد اس سال افغانستان کے ٹیسٹ میچوں کی مجموعی تعداد چار ہوجائے گی، جو کسی ایک کیلنڈر سال میں اس کے کھیلے گئے ٹیسٹ میچوں کی سب سے زیادہ تعداد ہوگی۔ افغانستان نے اب تک بنگلہ دیش کے خلاف دو ٹیسٹ میچ کھیلے ہیں، جن میں ایک جیتا اور ایک ہارا ہے۔ زمبابوے کے خلاف اس نے پانچ ٹیسٹ میچ کھیلے ہیں، جن میں دو میں کامیابی حاصل کی، دو میں شکست ہوئی جبکہ ایک میچ ڈرا رہا۔ افغانستان کرکٹ بورڈ کے چیف ایگزیکٹو آفیسر نصیب خان نے کہا، ’’ہمیں افغانستان کی قومی ٹیم کے لیے بین الاقوامی کرکٹ کے اس اہم مرحلے کی تصدیق کرتے ہوئے خوشی ہے۔ مختلف فارمیٹس میں بنگلہ دیش اور زمبابوے کے خلاف کھیلنے سے ہمارے کھلاڑیوں کو بہترین مسابقتی مواقع ملیں گے اور ہمارے شائقین کو بین الاقوامی کرکٹ کا ایک دلچسپ دور دیکھنے کو ملے گا۔ افغانستان کرکٹ بورڈ اپنی قومی ٹیم کو مسلسل اور اعلیٰ معیار کی بین الاقوامی کرکٹ فراہم کرنے کے لیے پرعزم ہے۔ ہم بنگلہ دیش کرکٹ بورڈ اور زمبابوے کرکٹ کے ساتھ اپنے تعلقات کو بہت اہمیت دیتے ہیں اور ان اہم مقابلوں کے انعقاد میں ان کے تعاون کی قدر کرتے ہیں۔‘‘