سرینگر؍۳۱
محکمہ موسمیاتِ ہند (آئی ایم ڈی) کے مطابق جموں و کشمیر میں آئندہ دو روز کے دوران وسیع پیمانے پر بارش اور گرج چمک کے ساتھ بادل برسنے کا امکان ہے، جبکہ۲ ستمبر سے موسمی سرگرمی میں بتدریج کمی آنے کی توقع ہے۔
محکمہ موسمیات مرکز، سرینگر کی جانب سے جاری تازہ ترین بلیٹن میں اتوار کے روز کشمیر میں کہیں کہیں سے لے کر متعدد مقامات پر بارش اور جموں میں وسیع پیمانے پر بارش کی پیش گوئی کی گئی ہے، جبکہ یکم ستمبر کو دونوں صوبوں میں ہلکی سے درمیانی بارش کے ساتھ گرج چمک کی توقع ہے۔
محکمہ موسمیات نے۳۱؍ اگست اور یکم ستمبر کو کشمیر کے بعض علاقوں میں گرج چمک، بجلی گرنے اور۳۰ سے۴۰کلومیٹر فی گھنٹہ کی رفتار سے تیز ہواؤں کا بھی انتباہ جاری کیا ہے۔
جموں ڈویژن میں۳۱؍ اگست اور یکم ستمبر کو بعض مقامات پر شدید بارش، گرج چمک، بجلی گرنے اور تیز ہواؤں کا امکان ہے۔ آئی ایم ڈی نے خبردار کیا ہے کہ شدید بارش کے دوران حساس علاقوں میں مٹی کے تودے، چٹانیں کھسکنے اور اچانک سیلاب کا خطرہ پیدا ہو سکتا ہے۔
۲ ستمبر سے بارش کی سرگرمی میں کمی آنے کی توقع ہے۔ اس روز کشمیر میں متعدد مقامات پر بارش جبکہ جموں میں کہیں کہیں بارش کا امکان ہے۔۳ سے۵ستمبر کے دوران کشمیر میں چند ایک مقامات اور جموں میں کہیں کہیں بارش متوقع ہے۔
محکمہ موسمیات نے۲ سے۵ستمبر کے دوران جموں ڈویژن میں بعض مقامات پر گرج چمک، بجلی گرنے اور۳۰ سے۴۰کلومیٹر فی گھنٹہ کی رفتار سے تیز ہواؤں کی بھی پیش گوئی کی ہے۔
دریں اثنا، جموں و کشمیر کے بیشتر علاقوں میں درجہ حرارت معمول سے زیادہ رہا۔ گزشتہ۲۴ گھنٹوں کے دوران کشمیر کے کئی علاقوں میں زیادہ سے زیادہ درجہ حرارت معمول سے۳ سے۵ ڈگری سیلسیس زیادہ رہا، جبکہ جموں میں یہ ایک سے۲ ڈگری زیادہ ریکارڈ کیا گیا۔
کشمیر میں کپواڑہ سب سے زیادہ درجہ حرارت۳۴ء۲ڈگری سیلسیس کے ساتھ سرِفہرست رہا، جبکہ جموں میں کٹھوعہ میں زیادہ سے زیادہ درجہ حرارت۳۵ء۴ ڈگری سیلسیس ریکارڈ کیا گیا۔
رات کے درجہ حرارت میں بھی معمول سے زیادہ گرمی دیکھی گئی۔ کشمیر کے بیشتر علاقوں میں کم سے کم درجہ حرارت۲ سے۵ ڈگری سیلسیس معمول سے زیادہ رہا، جبکہ جموں میں یہ۱ سے۴ ڈگری زیادہ تھا۔
کشمیر میں گلمرگ نے کم ترین کم سے کم درجہ حرارت۱۴ ڈگری سیلسیس ریکارڈ کیا، جبکہ جموں ڈویژن میں بھدرواہ میں یہ۱۸ ڈگری سیلسیس رہا۔
گزشتہ مدت کے دوران کٹھوعہ میں سب سے زیادہ۲۳ ملی میٹر بارش ریکارڈ کی گئی۔
اتوار کے لیے آئی ایم ڈی نے سرینگر میں جزوی طور پر ابر آلود موسم کے ساتھ ہلکی بارش یا گرج چمک کی پیش گوئی کی ہے۔ سرینگر میں زیادہ سے زیادہ درجہ حرارت تقریباً۳۰ ڈگری سیلسیس جبکہ کم سے کم درجہ حرارت۲۲ ڈگری کے آس پاس رہنے کا امکان ہے۔
جموں میں ہلکی سے درمیانی بارش یا گرج چمک متوقع ہے۔ وہاں دن کے وقت درجہ حرارت تقریباً۳۴ ڈگری سیلسیس اور رات کو۲۸ ڈگری کے قریب رہنے کا امکان ہے۔
محکمہ موسمیات نے عوام کو مشورہ دیا ہے کہ وہ موسمی صورتحال پر نظر رکھیں اور تازہ پیش گوئیوں سے باخبر رہیں، بالخصوص ان علاقوں میں جہاں مٹی کے تودے، زمین کھسکنے اور اچانک سیلاب کا خطرہ زیادہ ہو۔
۔۔۔۔۔۔۔
ایجنسیاں
