ورلڈ کپ فائنل سے قبل بنگلہ دیش میں بھی ارجنٹینا کے لیے جوش و خروش عروج پر

ڈھاکہ، 18 جولائی (یو این آئی) ڈھاکہ کی گلیوں، عمارتوں کی چھتوں اور دیواروں پر لہراتے نیلے اور سفید رنگ اور لیونل میسی کی تصاویر اس بات کا احساس دلاتی ہیں جیسے یہ ارجنٹینا کا کوئی شہر ہو، لیکن حقیقت میں یہ بنگلہ دیش ہے، جہاں فٹ بال کے دیوانے شائقین ورلڈ کپ فائنل سے قبل ایک بار پھر ارجنٹینا کے لیے اپنی بے مثال محبت کا اظہار کر رہے ہیں۔
تقریباً 17 کروڑ آبادی والے بنگلہ دیش نے اگرچہ کبھی فیفا ورلڈ کپ کے لیے کوالیفائی نہیں کیا، لیکن عالمی فٹ بال کے اس سب سے بڑے مقابلے کے لیے یہاں کا جوش کئی بڑی فٹ بال طاقتوں سے کم نہیں۔ اتوار کو نیو جرسی میں ہونے والے ورلڈ کپ فائنل میں دفاعی چیمپئن ارجنٹینا کا مقابلہ اسپین سے ہوگا، جس سے قبل ڈھاکہ سمیت ملک بھر میں شائقین کا جوش اپنے عروج پر پہنچ گیا ہے۔
جہاں بیونس آئرس میں شائقین ایک اور تاریخی جشن کی امید لگائے بیٹھے ہیں، وہیں دس ہزار میل سے زیادہ دور واقع ڈھاکہ میں بھی ارجنٹینا کے حق میں پرجوش ماحول دیکھنے کو مل رہا ہے۔
موٹر مکینک نورالاسلام نے اے ایف پی سے گفتگو کرتے ہوئے کہا، "ارجنٹینا اور مصر کے درمیان میچ کے دوران میں شدید دباؤ میں تھا، مجھے پسینہ آ رہا تھا اور میری آنکھوں میں آنسو بھی آ گئے تھے، لیکن اب مجھے پورا یقین ہے کہ ارجنٹینا ہی ورلڈ کپ جیتے گا۔”
بنگلہ دیش میں روایتی طور پر فٹ بال کے شائقین کی بڑی تعداد ارجنٹینا اور برازیل کی حمایت کے درمیان منقسم رہی ہے، تاہم رواں ورلڈ کپ میں برازیل کے پری کوارٹر فائنل میں ناروے کے ہاتھوں باہر ہونے کے بعد اس کے بہت سے مداح بھی ارجنٹینا کی حمایت میں آ گئے ہیں۔