قومی یومِ کھیل پر وزیراعظم نے کھیل کے جذبے کو سراہا، میجر دھیان چند کو کیا یاد

نئی دہلی، 29 اگست (یو این آئی) وزیر اعظم نریندر مودی نے ہفتہ کو ’قومی یومِ کھیل‘ کے موقع پر ملک کے کھیل شائقین کو مبارکباد دی۔ انہوں نے کھلاڑیوں کی لگن، جذبے اور عزم کو سراہا اور عظیم ہاکی کھلاڑی میجر دھیان چند کو خراج عقیدت پیش کیا، جن کی غیر معمولی صلاحیت آج بھی کھلاڑیوں کی کئی نسلوں کو متاثر کرتی ہے۔
مسٹر مودی نے سوشل میڈیا پلیٹ فارم ایکس پر ایک پوسٹ میں کہا کہ کھیل شائقین کی جانب سے دکھائی جانے والی وابستگی اور جوش ملک کے لیے باعث فخر ہے۔ وزیر اعظم نے کہا، ’’ہر کھیل شائق کو میرا سلام… آپ کی لگن، جذبہ اور عزم ہر کسی کو فخر کا احساس دلاتا ہے۔‘‘
ملک میں ہر سال 29 اگست کو ’قومی یومِ کھیل‘ منایا جاتا ہے۔ یہ دن ہاکی کی تاریخ کے عظیم ترین کھلاڑیوں میں سے ایک میجر دھیان چند کی یوم پیدائش کے موقع پر منایا جاتا ہے۔ یہ دن ہندوستانی ہاکی میں ان کی بہترین خدمات کو خراج تحسین پیش کرنے کے ساتھ ساتھ کھیل کے جذبے، جسمانی تندرستی اور صحت کی اہمیت کا جشن منانے کا بھی موقع ہے۔
ہاکی کے جادوگر میجر دھیان چند کو خراج عقیدت پیش کرتے ہوئے وزیر اعظم نے کہا کہ ان کی کامیابیاں اور کھیل میں عمدگی آنے والی نسلوں کو متاثر کرتی رہی ہیں۔
ہندوستانی کھیلوں کی تاریخ میں میجر دھیان چند کا مقام بہت خاص ہے۔ ان کی غیر معمولی مہارت اور کامیابیوں نے انہیں بین الاقوامی سطح پر شناخت دلائی اور ان کے دور میں ہندستان کو عالمی ہاکی میں ایک مضبوط طاقت کے طور پر قائم کرنے میں اہم کردار ادا کیا۔ ان کی یادگار وراثت آج بھی ملک کے نوجوان کھلاڑیوں اور ایتھلیٹوں کو متاثر کرتی ہے۔
وزیر اعظم مودی نے قومی ترقی میں کھیل اور جسمانی تندرستی کی اہمیت پر مسلسل زور دیا ہے۔ انہوں نے نوجوانوں کی زیادہ سے زیادہ شرکت کی حوصلہ افزائی کی ہے اور ہندستان سے کھیلوں کی مختلف اصناف میں اپنی موجودگی بڑھانے اور عمدگی حاصل کرنے کی اپیل کی ہے۔
حکومت نے نوجوان صلاحیتوں کی شناخت اور انہیں نکھارنے، بنیادی ڈھانچے کو بہتر بنانے اور کھلاڑیوں کے لیے مواقع بڑھانے پر مرکوز پروگراموں کے ذریعے کھیلوں کے نظام کو مضبوط بنانے کی کوششیں بھی تیز کر دی ہیں۔
قومی یومِ کھیل کے موقع پر وزیر اعظم کے پیغام میں میجر دھیان چند کے تئیں ملک کا خراج عقیدت جھلکتا ہے اور نظم و ضبط، عزم، عمدگی اور قومی فخر کو فروغ دینے میں کھیلوں کی بڑھتی ہوئی اہمیت کو ایک بار پھر اجاگر کیا گیا ہے۔