کھیلوں کے قومی دن پر ایس ایس بی نے 10 کلومیٹر طویل سائیکل ریلی نکالی

بیتیا، 29 اگست (یو این آئی) کھیلوں کے قومی دن کے موقع پر ہاکی کے جادوگر میجر دھیان چند کے یوم پیدائش کے موقع پر ہفتہ کو مسلح سرحدی فورس (ایس ایس بی) بیتیا اور 44ویں بٹالین نرکٹیا گنج کی جانب سے مشترکہ طور پر سائیکل ریلی نکالی گئی۔
کھیل شاخ، فورس ہیڈکوارٹر نئی دہلی کی ہدایت کے مطابق فٹ انڈیا موومنٹ مہم کے تحت یہ ریلی ایس ایس بی کے ڈپٹی انسپکٹر جنرل ہری پرکاش، سیکٹر ہیڈکوارٹر بیتیا کی رہنمائی اور 44ویں بٹالین کے کمانڈنٹ بلونت سنگھ نیگی کی قیادت میں منعقد ہوئی۔
دس کلومیٹر طویل سائیکل ریلی 44ویں بٹالین ہیڈکوارٹر سے شروع ہوکر نرکٹیا گنج اوور برج، دھوم نگر چوک، ہردیا چوک اور چاندپور چوک سے ہوتی ہوئی واپس بٹالین احاطے میں پہنچ کر اختتام پذیر ہوئی۔ اس دوران جوانوں نے باقاعدگی سے سائیکل چلانے اور جسمانی طور پر صحت مند رہنے کا پیغام دیا۔
ریلی کا مقصد مسلح فورسز کے جوانوں کے ساتھ عام شہریوں کو بھی صحت مند اور فِٹ طرز زندگی کے تئیں بیدار کرنا تھا۔ اس کے علاوہ 44ویں بٹالین کی مختلف سرحدی چوکیوں پر دیہی نوجوانوں کے ساتھ والی بال میچ منعقد کیے گئے۔ اس میں نوجوانوں کو کھیل کود سے جڑنے اور صحت مند طرز زندگی اپنانے کے لیے ترغیب دی گئی۔
اس موقع پر ڈپٹی کمانڈنٹ افسر گووند کمار ٹھاکر، نیرج تھاپا، ڈپٹی کمانڈنٹ گیانیندر کمار، اجے کمار سنہا، اسسٹنٹ کمانڈنٹ ریاض پی، انسپکٹر پرتاپ سنگھ نیگی، پون کمار سمیت دیگر افسران اور فورس کے اہلکار موجود تھے۔