سرینگر؍۲۸ا؍گست
۵۷روزہ سالانہ امرناتھ یاترا جمعہ کو باضابطہ طور پر اختتام پذیر ہوگئی، جب بھگوان شیو کی مقدس چھڑی ’’چھڑی مبارک‘‘ خصوصی پوجا کے لیے جنوبی کشمیر کے ہمالیہ میں واقع۳۸۸۰ میٹر بلند امرناتھ غار پہنچ گئی، حکام نے بتایا۔
۳ جولائی کو شروع ہونے والی یاترا کا اختتام رکشا بندھن کے تہوار کے ساتھ ہوا۔ یہ یاترا تقریباً تین ہفتے قبل۹ اگست کو راستے کو نقصان پہنچنے اور خراب موسمی حالات کے باعث سال کے لیے معطل کردی گئی تھی۔
حکام کے مطابق مہنت دیپندر گری کی قیادت میں سادھوؤں کا ایک گروپ چھڑی مبارک لے کر جمعہ کی علی الصبح مقدس غار پہنچا۔ گروپ نے شیش ناگ کے قیام گاہ سے تقریباً چھ کلومیٹر کا سفر پیدل طے کیا۔
چھڑی مبارک کے غار پہنچنے کے بعد وہاں خصوصی پوجا اور دعائیں کی گئیں۔ مقدس غار میں قدرتی طور پر تشکیل پانے والا برف کا شیو لنگم موجود ہے، جسے بھگوان شیو کا مظہر سمجھا جاتا ہے۔
سادھوؤں اور عقیدت مندوں کے گروپ نے پہلگام سے مقدس غار تک مجموعی طور پر۴۲ کلومیٹر کا سفر طے کیا، جبکہ چندن واری، شیش ناگ اور پنچ ترنی میں رات کے قیام کیے گئے۔
غار میں خصوصی دعاؤں کے بعد چھڑی مبارک نے واپسی کا سفر شروع کردیا۔ تاہم پوجن اور وسرجن کی رسومات اتوار کو پہلگام میں دریائے لدر کے کنارے ادا کی جائیں گی۔ اس کے بعد چھڑی مبارک سری نگر میں واقع اما ریشور مندر، دشنامی اکھاڑہ میں اپنے مستقل مقام پر واپس پہنچائی جائے گی، حکام نے بتایا۔
۔۔۔۔۔۔۔
(ویب ڈیسک )
