حکومت کی نیپال میں اچانک آئے سیلاب سے پیدا شدہ صورتحال پر کڑی نظر

نئی دہلی، 27اگست (یو این آئی) مرکزی حکومت نیپال میں اچانک آئی سیلاب سے پیدا ہوئی صورتحال پر کڑی نظر رکھے ہوئے ہے۔
مرکزی وزیر داخلہ امت شاہ نے نیپال میں آئی اس آفت کے سلسلے میں بہار اور اتر پردیش کے وزرائے اعلیٰ سے بات کی ہے۔ مسٹر شاہ نے سوشل میڈیا پر ایک پوسٹ میں کہا "نیپال میں آئے سیلاب کی تباہ کاری انتہائی افسوسناک ہے۔ جن خاندانوں نے اس آفت میں اپنے پیاروں کو کھویا ہے، میری تعزیت ان کے ساتھ ہے۔ بحران کی اس گھڑی میں حکومت ہند نیپال کے ساتھ کھڑی ہے۔
نیپال میں آئی اس آفت کے سلسلے میں بہار اور اتر پردیش کے وزرائے اعلیٰ سے بات کی۔ اس کا اثر جن سرحدی علاقوں پر پڑ سکتا ہے، وہاں کے مقامی انتظامیہ اور راحت و بچاؤ کی ٹیموں کے ساتھ این ڈی آر ایف کو بھی ہائی الرٹ پر رکھا گیا ہے۔”
مرکزی واٹر کمیشن کے مشورے اور میڈیا رپورٹس کے مطابق نیپال چین سرحد کے قریب اچانک آئے سیلاب کی وجہ سے نیپال میں بھارتی سرحد سے تقریباً 160 کلومیٹر دور فرکے کھولا میں ترشولی ندی کی سطح آب میں اچانک اضافہ ہوا ہے۔ اس سیلاب کا اثر ہندوستان میں گنڈک ندی کے نچلے علاقوں میں بھی پڑ سکتا ہے۔ بہار اور اتر پردیش کی ریاستی حکومتوں نے بھارت نیپال سرحد کے قریب رہنے والے مقامی بھارتی برادریوں کو محفوظ مقامات پر منتقل کرنے اور دیگر امداد فراہم کرنے جیسے اقدامات کیے ہیں۔