انتھونی اینڈریوز ہندوستان کی انڈر 17 خواتین ٹیم کے اسسٹنٹ کوچ مقرر

نئی دہلی، 26 اگست (یو این آئی) آل انڈیا فٹبال فیڈریشن (اے آئی ایف ایف) نے انتھونی اینڈریوز کو ہندوستان کی انڈر 17 خواتین قومی ٹیم کا اسسٹنٹ کوچ مقرر کیا ہے، جبکہ یوآکھم الیگزینڈرسن ہیڈ کوچ برقرار رہیں گے۔
ایسٹ بنگال ایف سی کے موجودہ ہیڈ کوچ اینڈریوز کلب اور قومی ٹیم، دونوں کی ذمہ داریاں بیک وقت سنبھالیں گے۔ وہ انڈین ویمنز لیگ کے چار خطاب جیتنے والے لیگ تاریخ کے سب سے کامیاب کوچ ہیں۔ ان کی قیادت میں گوکولم کیرالہ ایف سی نے 2021-22 اور 2022-23 جبکہ ایسٹ بنگال نے 2024-25 اور 2025-26 میں آئی ڈبلیو ایل ٹائٹل جیتے۔
اینڈریوز نے ایسٹ بنگال کو حالیہ اے ایف سی ویمنز چیمپئنز لیگ میں بھی نمایاں کامیابیاں دلائی ہیں اور گزشتہ سیزن میں کلب کو ایشیائی سطح پر میچ جیتنے والی پہلی ہندوستانی خواتین ٹیم بننے میں مدد دی۔
وہ اب تاشقند میں ہندوستان کی انڈر 17 خواتین ٹیم سے جڑ گئے ہیں، جہاں ’ینگ ٹائیگریس‘ 27 اور 30 اگست کو ازبکستان کے خلاف دو دوستانہ میچ کھیلیں گی۔ یہ مقابلے اے ایف سی انڈر 17 ویمنز ایشین کپ چین 2027 کوالیفائرز کی تیاری کا حصہ ہیں۔
کوالیفائرز 5 سے 11 اکتوبر تک ملائیشیا میں ہوں گے، جہاں ہندوستان گروپ ای میں ملائیشیا، شام اور عراق کے ساتھ شامل ہے۔
اینڈریوز نے قومی ٹیم کا حصہ بننے کو اعزاز قرار دیتے ہوئے کہا کہ وہ اپنی کوچنگ کا تجربہ نوجوان ہندوستانی کھلاڑیوں کی تربیت اور ان کی صلاحیت نکھارنے کے لیے استعمال کرنا چاہتے ہیں۔