ہونڈا موٹر سائیکل اینڈ اسکوٹر نے اے ڈی وی 160 اور ریبل 300 کی قیمتوں کا اعلان کیا، بکنگ شروع

نئی دہلی، 25 اگست (یو این آئی) جاپانی کمپنی ہونڈا موٹر کی دو پہیہ گاڑیاں بنانے والی ہندوستانی شاخ "ہونڈا موٹر سائیکل اینڈ اسکوٹر انڈیا” (ایچ ایم ایس آئی) نے اپنے دو نئے ماڈلز ‘اے ڈی وی 160’ ور ریبل 300کی قیمتوں کا اعلان کر دیا ہے۔
کمپنی نے منگل کے روز بتایا کہ بنگلورو میں ہونڈا اے ڈی وی 160 کی ایکس شو روم قیمت 1,70,000 روپے، ہونڈا ریبل 300 اسٹینڈرڈ کی 2,22,000 روپے اور ہونڈا ریبل 300 ای-کلچ کی 2,62,000 روپے ہوگی۔ یہ جولائی 2026 میں پیش کیے گئے کمپنی کے 10 پروڈکٹس والے پورٹ فولیو کے پہلے مرحلے کا حصہ ہیں۔ ان کے لیے بکنگ آج ہی سے کھول دی گئی ہے جبکہ ڈیلیوری اکتوبر کے وسط سے شروع ہوگی۔ صارفین صرف پانچ ہزار روپے دے کر بکنگ کروا سکتے ہیں۔
ایچ ایم ایس آئی کی پریس ریلیز میں کہا گیا ہے کہ ایڈوانسڈ موبلٹی ٹیکنالوجی، فلیکس-فیول انوویشن اور مختلف لائف اسٹائل تجربات کے ذریعے یہ ماڈلز صارفین کے لیے اختیارات بڑھانے کے ساتھ ساتھ ہندوستانی رائڈرز کی بدلتی ہوئی ضروریات کو پورا کرنے کے لیے تیار کیے گئے ہیں۔ ہونڈا اے ڈی وی 160 کمپنی کا پہلا فلیکس-فیول اسکوٹر ہے۔ یہ ہندوستان میں ایڈونچر-اسکوٹر موبلٹی کا ایک نیا زمرہ متعارف کرواتا ہے۔ اس اسکوٹر میں ای85 (E85 – 85 فیصد ایتھنول اور 15 فیصد پیٹرول) تک کا استعمال بغیر کسی پریشانی کے کیا جا سکتا ہے۔
ہونڈا ریبل 300 ہونڈا کے لائف اسٹائل موٹر سائیکل پورٹ فولیو کو وسعت دیتا ہے۔ عالمی ڈیزائن سے متاثر یہ کروزر موٹر سائیکل کم اونچائی والی رائڈنگ پوزیشن، منفرد اسٹائل اور کردار کے ساتھ کروزر سیگمنٹ میں نسبتاً آسان انٹری فراہم کرتی ہے۔ ملک میں تیار کردہ ریبل 300 گلوبل کروزر اسٹائل کو ہندوستانی رائڈرز کے وسیع طبقے تک پہنچاتی ہے۔ کمپنی آنے والے وقت میں ہندوستان میں صارفین کے لیے پریمیم، لائف اسٹائل اور نیکسٹ جنریشن موبلٹی کے اختیارات پیش کرے گی۔