جموں/۲۵؍اگست
پولیس نے منگل کو بتایا کہ عصمت دری کے ایک مقدمے کا وہ ملزم، جو تقریباً سات برس قبل پولیس حراست سے فرار ہوگیا تھا، جموں میں گرفتار کرلیا گیا ہے۔ ملزم کی گرفتاری کے لیے جموں خطے میں طویل عرصے سے تلاش جاری تھی۔
ایک الگ کارروائی میں کشتواڑ میں ایک بدنام منشیات فروش کو سخت دفعات کے تحت حراست میں لے کر جیل بھیج دیا گیا ہے۔
پولیس ترجمان کے مطابق ریاسی ضلع کے رہائشی توصیف احمد کو جموں میں گرفتار کیا گیا۔ وہ۲۰۱۹ میں پولیس حراست سے فرار ہوگیا تھا اور ایک خاتون کے اغوا اور عصمت دری سے متعلق مقدمے میں مطلوب تھا۔
ترجمان نے بتایا کہ فرار ہونے کے بعد ملزم نے گرفتاری سے بچنے کے لیے اپنی شناخت چھپانے کی کوشش کی اور محمد ساحل کے فرضی نام سے جعلی شناختی کارڈ بھی استعمال کیا۔ طویل تحقیقات کے بعد پولیس ٹیم نے اس کے ٹھکانے کا سراغ لگایا اور بالآخر اسے گرفتار کرلیا۔
ایک اور معاملے میں ادھم پور پولیس نے دیس راج نامی ایک مفرور کو گرفتار کیا، جو ضلع کے رہمبل علاقے میں امن میں خلل ڈالنے کے ارادے سمیت مختلف دفعات کے تحت درج۱۰ سال پرانے مقدمے میں مطلوب تھا۔
پولیس کے مطابق اسے مفرور قرار دیا گیا تھا اور ضلع موبائل مجسٹریٹ ادھم پور نے۱۱؍ اپریل۲۰۱۶ کو اس کے خلاف گرفتاری کے وارنٹ جاری کیے تھے۔
دریں اثنا، کشتواڑ ضلع میں ایک بدنام منشیات فروش حارث حسین کو غیر قانونی منشیات کی نقل و حمل کی روک تھام کے متعلقہ ایکٹ کے تحت حراست میں لے کر بھدرواہ ضلعی جیل منتقل کردیا گیا۔
پولیس ترجمان نے بتایا کہ حارث حسین کشتواڑ شہر میں منشیات کا ایک اہم سپلائر تھا اور تحقیقات کے دوران منشیات فروشی میں اس کے بار بار ملوث ہونے کا انکشاف ہوا، جس کے باعث اس کے خلاف احتیاطی حراست کی کارروائی عمل میں لائی گئی۔
ادھر کٹھوعہ ضلع کے بِلّاور علاقے کے دھرم کوٹ گاؤں سے مبینہ منشیات فروش نیتن کپور کو بھی پیر کے روز گرفتار کیا گیا۔ پولیس کے مطابق اس کے قبضے سے۹گرام ہیروئن برآمد ہوئی۔
ایک اور کارروائی میں پولیس ٹیم پر حملے کے مقدمے میں مطلوب ایک مبینہ مویشی اسمگلر کو جموں کے میران صاحب علاقے سے گرفتار کیا گیا۔ پولیس کے مطابق مراد علی عرف ’فجّی‘، جو مڑالیان کا رہائشی ہے، کئی ماہ سے گرفتاری سے بچ رہا تھا۔
پولیس کے مطابق اپریل میں اس نے اپنے ساتھیوں کے ہمراہ پولیس ٹیم پر مبینہ طور پر حملہ کیا تھا، جس میں دو اہلکار زخمی ہوئے تھے۔ اس واقعے کے بعد سے وہ فرار تھا۔
۔۔۔۔۔۔۔
ایجنسیاں
