آزاد اور کھلے ہند- بحرالکاہل کے لیے دفاعی تعاون بڑھائیں گے ہند-جاپان، بحری سلامتی معاہدے پر دستخط

نئی دہلی، 20 اگست (یو این آئی) وزیردفاع راج ناتھ سنگھ نے جمعرات کو یہاں جاپان کے دفاعی وزیر شنجیرو کوئزومی کے ساتھ وزراء دفاع کی سطح کی میٹنگ جس میں دونوں فریقوں نے آزاد اور کھلے ہند-بحرالکاہل خطے کے لیے دفاعی تعاون کو گہرا کرنے کے عزم کا اعادہ کیا۔
وزارت دفاع نے میٹنگ کے بعد جاری کردہ مشترکہ پریس بیان میں کہا کہ دونوں وزراء نے علاقائی اور بین الاقوامی سکیورٹی کی صورتحال پر جائزے کا تبادلہ کیا نیز جہاز رانی اور فضائی پرواز کی آزادی اور سکیورٹی میں رکاوٹ ڈالنے والے یکطرفہ اقدامات اور طاقت یا دباؤ کے ذریعے موجودہ صورتحال کو بدلنے کی کوششوں کی سخت مخالفت کی ہے۔ راج ناتھ سنگھ نے میٹنگ کے بعد سوشل میڈیا پر ایک پوسٹ میں کہا، "ہند-بحرالکاہل کی استحکام کی سمت میں اہم قدم۔ نئی دہلی میں جاپان کے وزیردفاع شنجیرو کوئزومی کے ساتھ نتیجہ خیز میٹنگ ہوئی ۔ میٹنگ میں ہم نے سمندری سکیورٹی تعاون مضبوط کرنے، میک ان انڈیا پہل کے تحت دفاعی ٹیکنالوجی تعاون بڑھانے اور حکمت عملی سے متعلق شراکت داری کو مزید مستحکم کرنے پر بات چیت کی۔”
مشترکہ پریس بیان میں کہا گیا ہے کہ دونوں فریقوں نے ہند-بحرالکاہل میں امن، استحکام اور خوشحالی کے لیے سمندری سکیورٹی تعاون کو عملی اور مؤثر طریقے سے بڑھانے پر اتفاق کیا۔ انہوں نے ایک مفاہمت نامہ پر دستخط بھی کیے جس میں سمندری خطے سے متعلق آگاہی، تلاش و بچاؤ، انسانی امداد اور آفت کے وقت امداد نیز ہندوستانی بحریہ اور جاپان میری ٹائم سیلف ڈیفنس فورس کے درمیان تعاون مضبوط کرنا شامل ہے۔ دونوں وزراء نے سمندری مواصلاتی لائنوں کی سکیورٹی کے لیے بحری جہازوں کے باہمی دوروں، مشترکہ مشقوں، فوجی اہلکاروں اور ماہرین کے تبادلے نیز بندرگاہوں، رکھ رکھاؤ اور مرمت کی سہولیات کے استعمال سمیت لاجسٹک تعاون بڑھانے پر اتفاق کیا۔ دونوں فریقوں نے بارودی سرنگوں کے خاتمے کی صلاحیتوں میں ہم آہنگی بڑھانے اور جاپان کی تکنیکی مہارت اور ہندوستان کی پیداواری صلاحیتوں کا استعمال کرتے ہوئے بحری جہاز سازی اور ڈیزائن میں مشترکہ ترقی کے امکانات تلاش کرنے پر بھی اتفاق کیا۔
ہندوستان اور جاپان نے دوطرفہ فوجی مشقوں کو مزید پیچیدہ اور وسیع بنانے، بغیر پائلٹ والے نظام کو شامل کرنے اور موقع ملنے پر کم وقت کے نوٹس پر مشترکہ مشقیں کرنے پر اتفاق کیا۔ دونوں فریقوں نے اس سال ہونے والی ‘ویر گارجین 26’ فضائی مشق کا خیرمقدم کیا، جس میں پہلی بار جاپان کے جنگی طیارے ہندوستان آئیں گے۔ انہوں نے ہند-بحرالکاہل کے وسیع نقطہ نظر کے ساتھ اعلٰی سطحی تبادلوں، فوجی مشقوں اور دیگر پہلوؤں کے ذریعے تعاون بڑھانے پر بھی اتفاق کیا۔ ہندوستان، جاپان اور انڈونیشیا کے درمیان اس سال فروری میں ہونے والی پہلی سہ فریقی بحری ‘پاسیکس’ مشق کا بھی خیرمقدم کیا گیا۔
دونوں فریقوں نے قدرتی آفات کے وقت پارٹنر ممالک کو اہلکاروں اور امدادی سامان پہنچانے کے لیے انڈو-پسیفک لاجسٹکس نیٹ ورک کے ذریعے تعاون بڑھانے پر اتفاق کیا۔ اس کے ساتھ ہی، اس سال ستمبر میں جاپان کی وزارت دفاع میں ہونے والی نیٹ ورک کی دوسری ٹیبل ٹاپ مشق کا خیرمقدم کیا۔ ہندوستان اور جاپان نے دفاعی سامان اور ٹیکنالوجی تعاون کو آگے بڑھانے، یونیکورن مربوط مواصلاتی اینٹینا سسٹم پروجیکٹ کو جلد از جلد عملی جامعہ پہنانے، ڈی آر ڈی او اور جاپان کے اے ٹی ایل اے کے درمیان جدید دفاعی ٹیکنالوجیز میں تحقیق و ترقی کے تعاون کو بڑھانے اور دفاعی صنعت کے فورم کے انعقاد پر بھی اتفاق کیا۔ دونوں وزراء نے تعاون کے مختلف شعبوں میں ہم آہنگی اور عمل آوری میں تیزی لانے کے لیے ڈائریکٹر جنرل/جوائنٹ سکریٹری سطح کے ورکنگ گروپ کے قیام پر بھی اتفاق کیا۔