پونا والا نے پھر دیا بی جے پی سے استعفیٰ

نئی دہلی، 17 اگست (یو این آئی) بھارتیہ جنتا پارٹی (بی جے پی) رہنما شہزاد پونا والا نے ایک بار پھر پارٹی سے استعفیٰ دینے کی پیشکش کرتے ہوئے پارٹی صدر نتن نبین سے اسے قبول کرنے کی گزارش کی ہے۔
مسٹر پونا والا نے اپنے استعفے کی کاپی پیر کے روز سوشل میڈیا ‘ایکس’ پر شیئر کرتے ہوئے کہا، "یہ میرے لیے انتہائی جذباتی لمحہ تھا کہ پارٹی نے میرے استعفے کو فوری طور پر قبول کرنے سے انکار کر دیا اور مجھ سے اپنے فیصلے پر نظرِ ثانی کرنے کی درخواست کی تھی، لیکن طویل غور و خوض اور سنجیدگی سے سوچنے کے بعد میں نے قومی ترجمان کے عہدے اور بی جے پی کی فعال بنیادی رکنیت سے سبکدوش ہونے کا فیصلہ کیا ہے۔”
انہوں نے کہا، "گزشتہ چند دنوں کے واقعات (جن افراد کے بارے میں میں نے آپ کو تفصیل سے بتایا ہے) نے مجھے اپنے سابقہ فیصلے پر قائم رہنے کے لیے مجبور کیا ہے۔ وزیر اعظم نریندر مودی، پارٹی صدر نتن نبین، وزیرِ داخلہ امت شاہ، وزیرِ دفاع راج ناتھ سنگھ اور تنظیم کے جنرل سکریٹری بی ایل سنتوش جیسے سینئر رہنماؤں کے تئیں بغیر کسی رنجش کے، صرف ممنونیت، محبت، الفت اور اعلیٰ ترین احترام کے ساتھ میں اپنی طرف سے گزشتہ پانچ سال میں پارٹی کی طرف سے مجھے دیے گئے پلیٹ فارم اور مواقع کے لیے ایک بار پھر شکریہ ادا کرتا ہوں۔”
مسٹر پونا والا نے کہا، "جیسا کہ میں نے پہلے کہا تھا، انتہائی ضروری معاشی اور ذاتی حالات کی وجہ سے میں نجی سیکٹر میں داخل ہورہاہوں ، لیکن جہاں بھی ممکن ہو گا اور جس شکل میں بھی ممکن ہو گا، میں وزیر اعظم مودی جی اور بی جے پی کے نقطہ نظر اور کاموں کی حمایت کرتا رہوں گا۔ میں پارٹی کا تنظیمی ڈھانچہ چھوڑ رہا ہوں، نظریات اور شخصیت نہیں۔”
قابلِ ذکر ہے کہ مسٹر پونا والا نے سال 2017 میں کانگریس سے استعفیٰ دے دیا تھا اور بی جے پی میں شامل ہو گئے تھے۔ اس کے بعد سے وہ مسلسل ٹی وی مباحثوں میں پارٹی کا موقف رکھتے تھے اور اب انہوں نے بی جے پی چھوڑنے کا اعلان کیا ہے۔