ایجنسیاں
سرینگر؍۱۷جولائی
سرینگر پولیس نے جمعہ کو بتایا کہ اس نے پنجاب پولیس کے ساتھ قریبی تعاون اور مربوط کارروائی کے ذریعے لاپتا ہونے والی تین کمسن لڑکیوں کو۷۲ گھنٹوں کے اندر امرتسر سے بحفاظت بازیاب کر لیا ہے۔
سرینگر پولیس کے ترجمان نے ایک بیان میں کہا کہ بازیاب کی گئی تینوں لڑکیوں کو واپس سرینگر لایا جا رہا ہے، جہاں تمام ضروری قانونی کارروائیاں مکمل کی جائیں گی اور قانون کے مطابق مزید تحقیقات آگے بڑھائی جائیں گی۔
بیان کے مطابق، ’’شکایت موصول ہوتے ہی سرینگر پولیس نے فوری طور پر وسیع پیمانے پر تحقیقات کا آغاز کیا اور تینوں لاپتا لڑکیوں کے بارے میں اہم سراغ حاصل کیے۔ اس کے بعد ایک خصوصی ٹیم کو فوری طور پر پنجاب روانہ کیا گیا، جہاں پنجاب پولیس کے فعال تعاون اور قریبی رابطے سے تینوں کمسن لڑکیوں کو۷۲گھنٹوں کے اندر امرتسر سے بحفاظت تلاش کرکے بازیاب کر لیا گیا۔‘‘
ترجمان نے بتایا کہ یہ کارروائی پولیس اسٹیشن رام منشی باغ، سرینگر میں بھارتیہ نیائے سنہتا (بی این ایس) کی متعلقہ دفعہ کے تحت درج ایک ایف آئی آر کے سلسلے میں عمل میں لائی گئی۔ اس دفعہ کے تحت جرم ثابت ہونے پر سات سال تک قید اور جرمانے کی سزا ہو سکتی ہے۔
تاہم، ترجمان نے یہ نہیں بتایا کہ تینوں کمسن لڑکیاں امرتسر کیسے پہنچیں۔
