ایجنسیاں
بانہال/۱۵جولائی
جموں و کشمیر کے ضلع رام بن میں بدھ کے روز جموں،سری نگر قومی شاہراہ پر ایک بڑی چٹان کار پر گرنے سے سابق سرپنچ جاں بحق ہو گئے۔ پولیس حکام نے بتایا کہ حادثہ ٹرشول موڑ کے قریب پیش آیا۔
پولیس کے مطابق محمد اقبال تانترے(۶۰) اپنی کار میں سری گاؤں سے رام بن قصبے کی طرف جا رہے تھے کہ اسی دوران پہاڑی سے ایک بڑی چٹان لڑھک کر ان کی گاڑی پر آ گری۔
رام بن کے اسٹیشن ہاؤس آفیسر (ایس ایچ او) وکرم سنگھ پریہار نے بتایا کہ چٹان محمد اقبال تنتری کے سر پر لگی، جس کے نتیجے میں وہ شدید زخمی ہو گئے۔انہیں فوری طور پر ضلع اسپتال رام بن منتقل کیا گیا، تاہم ڈاکٹروں نے معائنے کے بعد انہیں مردہ قرار دے دیا۔
ایس ایچ او نے بتایا کہ پولیس نے اس سلسلے میں مقدمہ درج کرکے مزید تحقیقات شروع کر دی ہیں۔
واضح رہے کہ جموں،سری نگر قومی شاہراہ، خصوصاً برسات کے موسم میں، چٹانیں گرنے اور لینڈ سلائیڈنگ کے خطرات سے دوچار رہتی ہے۔ اسی بنا پر انتظامیہ مسافروں کو حساس مقامات سے گزرتے وقت انتہائی احتیاط برتنے کی ہدایت جاری کرتی رہتی ہے۔
۔۔۔۔۔۔۔۔۔۔
