ایجنسیاں
سرینگر؍۲ جولائی
جموں کشمیر میں تشخیصی صحت (میڈیکل ڈائیگنوسٹک) کے ڈھانچے کو مضبوط کرنے کے لیے مرکز کی مودی حکومت نے ’وزیر اعظم فنڈ‘ کے تحت جموں و کشمیر کو مصنوعی ذہانت ( اے آئی) سے لیس۲۷۵ پورٹیبل ہینڈ ہیلڈ ایکس رے مشینیں، نو ایم آر آئی مشینیں اور چار ڈیجیٹل میموگرافی مشینیں الاٹ کرنے کا فیصلہ کیا ہے۔
سرکاری ذرائع نے بتایا کہ اس پروجیکٹ کو لاگو کرنے کے لیے مرکزی وزارتِ صحت و خاندانی بہبود اور جموں و کشمیر حکومت کے درمیان ایک مفاہمت نامے پر دستخط کیے گئے ہیں۔
ذرائع کے مطابق، ان جدید آلات کو مرکز کے زیرِ انتظام علاقے (یو ٹی) کے منتخب سرکاری طبی اداروں میں نصب کیا جائے گا تاکہ تشخیصی خدمات کو بہتر بنایا جا سکے، بیماریوں کی جلد تشخیص ہو سکے، چھاتی کے کینسر (بریسٹ کینسر) کی اسکریننگ اور اے آئی کی مدد سے ٹی بی (تپ دق) کی جانچ میں مدد مل سکے۔
ان آلات کی خریداری، تنصیب اور انہیں چلانے کا کام مرکزی حکومت اپنی طے شدہ ایجنسیوں کے ذریعے کرے گی اور امید ہے کہ آنے والے مہینوں میں ان کی سپلائی مکمل ہو جائے گی۔
صوبائی حکومت کے ایک افسر نے کہا’’محکمہ صحت اور طبی تعلیم یہ یقینی بنائے گا کہ مراکز وقت پر تیار ہوں، ضروری عملہ (اسٹاف) تعینات ہو اور ان آلات کو جلد از جلد چالو کیا جائے، تاکہ جموں و کشمیر کے عوام کو یہ جدید ترین تشخیصی سہولیات جلد سے جلد مل سکیں‘‘۔
یہ الاٹمنٹ محکمہ صحت اور طبی تعلیم کی مسلسل کوششوں کا نتیجہ ہے اور یہ ریاست میں صحت کی دیکھ بھال کے نظام کو مضبوط کرنے اور جدید تشخیصی سہولیات تک عام لوگوں کی پہنچ بڑھانے کی ترجیح کو ظاہر کرتا ہے۔
ریاست کے چیف سکریٹری اٹل ڈلو، صحت کے شعبے میں اصلاحات کے اقدامات کی خود نگرانی کر رہے ہیں۔ ان کا پورا زور طبی اداروں کو جدید بنانے، تشخیصی صلاحیتوں کو بہتر بنانے اور پورے مرکز کے زیرِ انتظام علاقے میں معیاری صحت کی خدمات تک مساوی رسائی کو یقینی بنانے پر ہے۔
